Nongpoh, Ïaiong 02: U Deputy Commissioner (Supply), Ri-Bhoi District u la bthah ïa baroh ki nongtreikam sorkar ba kynthup ruh ïaki nonghikai Adhoc bad Deficit hapoh ka district kiba ioh jingmyntoi naki card rashon AAY/ PHH Category hapoh ka NFSA ba ki dei ban aiti noh sha ka ophis jong u Deputy Commissioner (Supply) ha lane shuwa ka 30 tarik Ïaiong 2025 namar ba ka jingai ïaki card rashon sha ki nongïoh jingmyntoi na ka NFSA la leh 14 snem mynshwa, naduh u snem 2011, katkum ka Socio Economic Caste Census 2011, bad bun ki nongïoh jingmyntoi kiba bat ïa ka Rashon Card hapoh ka NFSA ki la ïoh kam sorkar ha kine ki sngi.
Katkum ki kyndon, ki nongtrei sorkar kim hap hapoh ki kyndon ban bat ïa ka card rashon. Kumta la kyrpad ïa baroh ki nongtrei sorkar kynthup ïa ki nonghikai Deficit bad Adhoc ba kin aiti noh ïa ki card rashon jong ki hapoh ka tarik ba la buh khnang ba kito ki longiing ba duk, ki nongtrei bylla, kiba duna dkhot met bad kiba donkam shisha kin ioh ka jingmyntoi.
Ha kajuh ka por, ka ophis ka dang pynkhreh ruh ïa ka thup jong ki nongtrei sorkar kiba bat ia ki card rashon, lada kim aiti ïa ka card hapoh ka por ba la buh, kin sa ngat haki kyndon jong ka aiñ.
