Shillong, Jylliew 23: U Chairperson ka National Commission for Protection of Child Rights (NCPCR) u la bthah ïa ka Sorkar Jylla ban leh ïa ka survey ïa baroh ki ‘Madrasa’ ne ki skul niam Muslim ha Meghalaya bad pynthikna ba ki khynnah kin ïoh rung skul haba bthah ban ai jingmyntoi ïa palat 360 ngut ki khynnah, kiba im bad ka jingpang HIV.
Ha kaba iadei bad kane haba ïakren bad ki nongthoh khubor ha ka sngi Saitjaiñ, u Chairperson ka NCPCR Priyank Kanoongo ula ong, “Kane ka dei kaba ima. Ngi la kyrpad ïa ki bor khmih ban leh survey ïa baroh ki Madrasa ha ka Jylla bad ban pynrung skul ïa baroh ki khynnah namar katkum ka Article 21 (a) jong ka Riti Synshar ka Ri, baroh ki khynnah ki don ïa ka hok ban ïoh leit skul tad haduh ka rta ba 14 snem bad wat ka Sorkar Jylla ka hap ban ai sha ki ïa kane ka hok ban ïoh leit skul”.
U la ong, “Ki Madrasa kim dei ki skul hynrei ki dei ki jaka ai jinghikai niam. Nga la mad ïa kawei ka jingjia, ha kaba nga la kren ïa uwei u khynnah ha ka jylla Meghalaya ha ka jingleit sha Ampati ha u bnai ba la dep, uba dang wanphai na ka Madrasa, kumta ula ïathuh ïa nga ba u la pule ïa kaba ïadei bad ka niam. Nga lah kylli kaei kaba u kwah ban long ynda ula heh, ula ong ba um kwah ban long kum kino kino ki doctor ne nongïasaid aiñ hynrei u dang pynkhreh ïalade na ka bynta ka ‘Akirat’ kaba mut ka jingim hadien ka jingïap, u dang pynkhreh ïalade ïa ka sngi jong ka jingshah tian bishar. Kane ka long kaba sngewkyndit bad nga la pyni ïa katei ka video ha ki bor kiba dei khmih.”
Halor kane u la ong ba ka Tnat kaba dei khmih kam don jingtip eiei shaphang ka jingdon ka Madrasa ha ka jylla.
“Ngi lah kyrpad ïa tnat pule puthi ban khmih bniah bad ban pynrung ïa kitei ki khynnah ha kine ki skul khnang ba ki khynnah ki lah ban ïoh ïa ka hok ka jong ki ban pule puthi kumba la pynkupbor ha ka Article 21 (a) jong ka riti synshar ka ri India,” ong u Kanoongo.
Ha kaba ïadei bad kane, u Chairperson ula ong, ba la dep ban bthah ïa ka tnat pule puthi bad ka tnat Tribal Affairs ban pynbun ïa ki hostel ne jaka sah ki khynnah pule na ka bynta ban kynthup ïa ki khynnah ki bym shym la leit skul ha ka jylla.
“Ngi lah kyrpad ïa ka tnat Labour ban pynbiang ïa ka jingai bai bam ïa ki khynnah kiba la pyllait na ki jaka kiba la pyntrei bylla ïa ki,” ong u Chairperson.
Na ka liang u Kanoongo ula ong ba halor ka kam kaba ïadei bad ki khynnah kiba ïoh ïa ka jingpang HIV ka la sdang ban bun bha ha ka jylla Meghalaya.
“Kumba 364 ngut ki khynnah kila shah ktah na ka jingpang HIV. Ngi lah dep kyrpad ïa ka tnat Women & Child ban khmih bniah ïa kitei baroh bad lada lah ban ai da ka jingïarap ha ka song tyngka lyngba ka Section 45 jong ka JJ Act, khnang ba kin lah ban ïoh ïa katei ka jingmyntoi halor ka jingdonkam ïa ka pisa.
U la ong ba ka Meghalaya ka don palat 8,000 ngut ki briew kiba la heh la san kiba don ïa ka HIV.
“Ngi lah kyrpad ïa ka sorkar ban khmih bniah ïa kitei ki longïing la ki don ïa kino kino ki khyllung kiba dei kiba duk bad kiba lah ban ïoh ïa ka jingkyrshan pisa, kumta dei ban pynbiang ïa ki da kaba ai ïa ka jingkyrshan pisa,” ong u Kanoongo.
Ha kaba ïadei bad ki kam thombor pyrshah ïa ki khynnah, u Chairperson ula ong, ba ula dep ban kyrpad ïa ki bor ban thung ïa ka ophisar pulit kynthei ha ki Police Station kiban trei kum ki Child Welfare Police Officer.
“Nga la rah ïa katei ka mat ha ka jingïalang ba ka Commission ka la ïohi ba ka la don ka jingthombor ha ki katto katne ki Police Station khamtam haba ka la don ka jingthombor ruh ïa ki khynnah kynthei, ha kitei ki jaka jong kitei ki Police Station ngi la sakhi ba kim shym la don bun ngut satia ki pulit kynthei kumta ka long kaba donkam ban buh noh ïa ki,” ula ong bad bynrap, “Ngi lah dep kyrpad ban ai jinghikai ïa ki Child Welfare Committee bad ban ai jinghikai ïa ki da kaei kaba la pynkhreh lypa da ka NCPCR ban ïada na kum kitei ki jait jingjia.”
Haba kylli ba dang shen ka la don ka jingjia ha ka shnong Kuliang ha kaba la kynnoh ba ki BSF kila leh khlemakor ïa kawei ka khynnah kynthei kaba dang rit, u Chairperson ula ong, “Ngam pat ïoh jingtip eiei hynrei ngin sa phah jingpynbna lada donkam bad ngin phah ban pynlong ïa ka jingtohkit lada ka khynnah kam ïoh ïa kano kano ka jingmyntoi kumba kadei ban ïoh”.
U Kanoongo u la ong ba ka Commission ka la shimkhia ruh ha kaba ïadei bad ka jingpun khun ki khynnah kynthei kiba dang rit ka rta hapoh ka jylla Meghalaya.
“Ngi lah ïatai sani bha halor kane bad ngi lah bthah ïa ka sorkar jylla bad ai jingmut kumno ba kan ïaid ha kaba ïadei bad katei ka kam, da kaba ïakren bad ka imlang sahlang, ban ïakren bad ki dkhot jong ka Council bad ban pynlong ïa ki jingïalang pynsngewthuh paidbah lyngba ki Self-Help Group,” ula ong.
