Shillong, Nailar, 20: U Myntri jong ka tnat Kam Pohing ka Ri u Amit Shah u la bthah ïa baroh ki Director General of Police ka Ri India ba kin long kiba peitngor ïa ki jingkylla bad ki jinglong jingman ha ki bynta khappud jong ka ri India bad ki ri kiba marjan.
Ha ka jingïalang jong ka National Security Strategies Conference 2022 kaba la long ha New Delhi bad kaba la kut noh ha ka sngi Palei, ha kaba la ïashim bynta da ki Myntri Khynnah ka tnat Kam Pohing kiba kynthup ïa u Ajay Kumar Mishra, u Nishith Pramanik bad ki khliehduh jong ki tnat Syntiat ka Sorkar Pdeng, ki CAPF, CPO bad DGP jong ki jylla ka ri India, u Amit Shah u la ïathir ïatai sani bha kumno ban tehlakam ïa ka shongsuk shongsaiñ hapoh ka ri. U la pyntip ruh ha kane ka jingïalang ïa ki kam kiba u Myntri Rangbahduh u Narendra Modi ban pynkhlaiñ ïa ki bor pahara ha baroh kawei ka ri.
U Amit Shah u la pyntip ba naduh u snem 2014 u Narendra Modi u la trei shitom ban wanrah ïa ki jingpynbha ha ki jingïalang jong ki DGP. Ka jingbishar bniah halor kane ka la pynpaw ba ngi la jop ha kaba wadlad kumno ban weng ïa ki jingeh.
“Baroh ki jylla ki dei ban buh hakhmat ïa ki mat kiba ktah ïa ka shongsuk shongsaiñ jong ka ri. Kane ka dei ka thma jong ka ri bad na ka bynta ka lawei jong ki samla. Ngi dei ban ïakhun lang kawei khnang ban jop ïa kane ka thma,” ong u Amit Shah.
U Shah u la bthah ïa ki DGP ba kin long kiba peitngor ïa ka jinglong jingman bad ïa ki jingkylla kiba ju jia na ka sngi sha ka sngi ha ki bynta khappud.
U la ong ba kane ka dei ka kamram bad ka jingkitkhlieh jong ki DGP ban pynthikna ba baroh ki jingtip dei ban lum bin pa bin, khamtam na ki district kiba don ha ki bynta khappud jong ka ri.
“Hadien ba la shimti kum u Myntri Rangbahduh ha u snem 2014, u Narendra Modi ym tang ba u la aibor ïa ki shipai, hynrei la pynkhlaiñ ruh ïa ka jingpahara khnang ban ïakhun ïa ki jingshah tynjuh kiba wan hakhmat,” u la ong.
“Ha kaba ïadei bad ka jingtem ïa ki jingshah pynthud ka shongsuk shongsaiñ, ngi la lah ban ïakhun pyrshah ïa ki lai tylli ki jingeh, ka jingpyntriem ki kam lehnoh ha Jammu & Kashmir, ka jingmih ki kynhun kieng atiar ha North-East bad ki Left Wing Extremism. Hapoh ka jingïalam jong u Narendra Modi, ngi la wanrah ïa ki aiñ kiba thymmai, ban pynjanai ïa ka jingïadei bad ki Jylla, ban mang kham bun ka pisa bad ban pyndonkam pura ïa ki tiar kiba thymmai katkum ka juk kaba mynta,” la bynrap u Shah.
Ha ka sien banyngkong eh, ka ri India ka la wanrah ïa ka National Automated Fingerprint Identification System (NAFIS), bad ïa kaba yn sa pyntreikam puta.
“Ka jingkurup ïa ki tiar beaiñ kam pat biang. Ngi donkam ban ïakhun pyrshah ban pyndkut ïa u thied jong ka jingkhaii drok bad ban thwet ïa ka tyllong khaii bad ïa ka jingpynpoi ïa u drok naba ka long kaba kongsan. Ngi donkam ban ïoh ïa ki jingtip kiba biang ha kaba ïadei bad ki jingtohkit da ki jylla. Dei ban pynlong manla ka por ïa ki jingïalang jong ka NCORD ha ki District bad ba ki paidbah ki dei ban ïatreilang ryngkat. U Myntri Rangbahduh u la wanrah ïa ka Technology Mission bad ka la long kaba jop bad ngi dei ban trei shitom shuh shuh ba kane ka jingthmu kan long kaba treikam pura,” la ong u Shah.
“Ka Sorkar Jylla ka la pynkhreh ïa ka Database ne ka jinglum jingtip ha kaba ïadei bad ki kam runar ruser bapher bapher. Ha ka sien ba nyngkong eh ha ka ri, ngi dei ban pyndonkam ïa ka 5G Technology ban pynkhlaiñ ïa ka jingïada. Ka nongrim ba kongsan jong ka tnat syntiat ba thymmai kam long ‘tang ban ïoh jingtip’ hynrei ka long ruh kaba ‘donkam ban ïasam jingtip’, bad ka ‘kamram ban ïasam jingtip’ namarba lada ngim pat lah ban pynkylla ïa ka rukom treikam, ngin ym lah ban ïoh ïa ka jingjop” la bynrap shuh shuh u Myntri ka tnat Kam Pohing.
“Ngi dei ban phaikhmat ruh ha ka Technical Intelligence (techint) ryngkat bad ka Human Intelligence (Humint),” ong u Shah bad bynrap, “kane ka jingïalang kan ïarap ïa ki ophisar kiba dang khynnah ban tip shaphang kine ki ishu kiba ïadei bad ka kam ïada ïa ka ri.”
Ha ki ar sngi ba la pynlong ïa kane ka jingïalang, la ïathir ïatai ruh halor ka jingïakhun pyrshah ïa ki kam pyntriem jong ki seng kieng atiar, ka jingeh na ka jingdon jong ki kynhun kieng atiar Maoist bad Front Organisation, ka Crypto Currency, ka Counter Drone Technology, ban peitngor ïa ki jingjia ha ka Cyber bad Social Media, ka jingïada ïa ki Ports bad ki dewlynnong, ka jingeh kaba mih na ka 5G Technology, ka jingkylla dur ha ki shnong ki thaw bad ka jingkharoi ki kynhun pyrshah ha ki thaiñ khappud bad ïa ka jingkhaii tuh ïa ki jingdih pynbuaid.
