Bthah ka Sorkar ïa ki trai ïing bad nongshong wai ban pynrung kyrteng lyngba ka MRSSA

Shillong, Risaw, 30: Ka Sorkar Meghalaya ka la pyntreikam ïa ka Meghalaya Residents Safety and Security Act, 2016 ka la buh hakhmat ïa ka jingthmu ban pynthikna ïa ka jingshngaiñ jong ki nongshong shnong ka jylla da kaba bishar sani bha bin pa bin ïa ki nongshong wai kiba sah ha kylleng ki bynta jong ka jylla.
Ka jingpyntreikam ïa kane ka Aiñ kan ïada ïa ki riew shim kabu bad ïa ki runar ban ïoh jaka rieh hapoh ka jylla bad ban pyrkhing da ka aiñ na ka bynta khanglad ïa ka jingrung kyrthep be-aiñ bad ki nongbylla ba wan trei be-aiñ kiba lah ban rung bad sah ha ki shnong bapher bapher.
Na ka bynta ka jingpyntreikam ïa kane ka aiñ, ka Sorkar da ka jingïatreilang bad ka NIC, Meghalaya ka la pynbna paidbah ïa ka online application ha ka 8 tarik, Nailur 2023 khnang ba ki nongshong shnong (trai iing/nongai wai) kin dup lah ban pynrung kyrteng ïalade da ka jingpynshisha na ki bor synshar shnong.
Namarkata, baroh ki trai iing/ki nongshong wai kiba sah hapoh ki hynñiew tylli ki shnong, kiba kynthup ïa ka shnong Nongrim Hills, Pohkseh, Nongrah, Nongmensong, Lapalang, Riat Laban bad Wahdienglieng la jied ha ka wat ka banyngkong, ba ki dei ban pynrung kyrteng ïalade ha ka App lyngba ka URL https://megrssa.nic.in ïa kaba lah ban plie lyngba ki PC, Laptop, Tablet bad Smart Phone. Ki trai ing bad ki nongai iing wai ki lah ban pynrung kyrteng ruh lyngba ka Mobile App da kaba shu sei (downloaded) na ka website ba la kdew.
Ïa ki kot ki sla ba donkam bad kiwei kiwei ki jingtip kiba bniah lah banïoh na ka ophis jong ka Deputy Commissioner, East Khasi Hills, Shillong bad na ki Rangbah Shnong jong kine ki shnong ba la kdew haneng.