Bthah ka sorkar ïa ki artylli ki tnat ban aiti ïa 137 acre ka jaka na ka bynta ban thaw ïa ka IE

Shillong, Jylliew 17: Ka Tnat jong ka Agricuiture and Farmer’s Welfare bad ka Soil & Water Conservation ki la shah bthah ba kin aiti ïa ki jaka sha ka Invest Meghalaya Authority (IMA) na ka bynta ban thaw ïa ka Industrial Estate (IE) kaba thymmai.
Ka shithi halor kane la phah da Commissioner & Secretary in-charge Agriculture and Farmers’ Welfare bad Soil & Water Conservation da Chief Administrative Officer, Invest Meghalaya Authority ha ka 5 tarik mynta u bnai, ba kin aiti ïa ki jaka sha ka IMA.
Ka shithi ka batai ruh ïa ka jingïalang ba la pynïaid da u Myntri Rangbah ka jylla kaba la long ha ka 03.05.2024, la rai ban pynthikna ïa ki jingdonkam jong baroh ki jaka sorkar, la ong ba ka long kaba donkam ban aiti ïa kitei ki jaka na ka bynta ka jingthmu jong ka sorkar.
Lah ban kdew ba ka sorkar ka thmu ban kyntiew ïa ka ïoh ka kot jong ka jylla ban kynjoh sha ka $10 billion economy ha u snem 2028 bad na ka bynta kane ka jingthmu, ka donkam ka jingpynlut bad ka jingkiew ki karkhana ban kynjoh ïa katei ka jingdonkam bad ka thong.
Ka shithi ka pyntip ruh ba kawei na ki rai ba la shim ha ka jingïalang kadei ka jaka kaba 107 acre jong ka Soil & Water Conservation Department kaba mynta la pyndonkam na ka bynta ka Conservation Training institute bad ka jaka 27 acre ba la long trai da ka tnat Agriculture kiba baroh artylli ki don ha Byrnihat, Ri Bhoi District kin kylla long ki Industrial Estate.
Kine ki jaka dei ban aiti sha ka IMA, na ka bynta ban thaw ïa ki industrial units.
“Halor katei la kyrpad ïa ka Soil & Water Conservation Department bad ka Agriculture & Farmers Welfare Department ban pyndep ïa ka sketch map jong ka jaka da ki jingtip kiba bniah ba la thaw da ka tnat halor katei ka jaka,” ong ka kyrwoh khubor.
Shuh shuh ïa kitei ki tnat la kyrpad ba kin pyndep ïa la ki kamram ban aiti ïa ki jaka sha ka Invest Meghalaya Authority (lMA) Commerce bad Industries Department, ka la ong.