Bthah ka JHADC ïa baroh ki nongïalam kur ban pynrung kyrteng ïa ka sengkur jong ki

Jowai, Nailar 07: Ka Secretary Executive Committee ka Jaiñtia Hills Autonomous District Council, Jowai kong B. Bamon, mynta ka sngi 7 tarik u Nailar, 2024 kala pynbna paidbah ba ka Executive Committee JHADC, Jowai kala sngewdei ban shna noh da ka aiñ ban ithuh ïa baroh ki Kur bad seng kur trai ri trai muluk kiba don hapoh u pud u sam ka Jaiñtia Hills Autonomous District Council. Ha kaba ïadei bad kane la bthah ïa baroh ki Sengkur ban wan pynrung kyrteng ïa ka Sengkur jong ki, ïa ki nongkitkam jong ka sengkur bad kumjuh ruh ban phah ïa ki kur kiba kynthup hapoh ka sengkur jong ki da kaba ai por hapoh 2 (ar) bnai naduh ba la pynmih ïa kane ka jingpynbna.