Shillong, Naitung 19: Ka Hynñiewtrep Youth Council (HYC) ka la bthah ïa baroh ki jylli treikam (Circle/Unit) ba kin khang ban nym ailad ïa ki briew na Bangladesh ba kin wan rung kum ki phetwir ne poiwir sha u pud u sam ka Ri-lum Khasi Jaiñtia.
Kane ka jingbthah ka la mih na u President ka HYC u Bah Roykupar Synrem, uba la phah da ka shithi sha baroh ki nongïalam bad ki dkhot ka Seng hangne ha ka Bri U Hynñiewtrep.
Katkum ka shithi, u Bah Roykupar ula ong ba ka jingïakynad bad ka jingthut ka shongsuk shongsaiñ ha ri Bangladesh, ki bar ri, ki lah ban shim kabu ïa ka jinglong jingman ha katei ka ri bad kin wan rung bad buhai shnong hapoh ka Ri-lum Khasi kum ki phetwir.
“Nga kyntu ïa ki shipai ka Seng ba phin ïapeit pyrman bha ha ki jylli treikam ki jong phi ha ryngkat bad ki bor shnong, ki bor Hima ban pynthikna ba ki bar ri kiba lah ban shim kabu ïa ka jinglong jingman ha katei ka ri, kin wan rung bad buhai shnong hapoh ka Ri-lum baieid jong ngi,” ong u Bah Roy ha ka shithi.
“Kiba kum kitei ki briew ki lah ban shim kabu ha kum kane ka por ban wan rung kum kita ki phetwir ban wad jaka sah shipor hynrei suki suki kin kylla long ki nongshong shnong ba pura bad hangta kan sa eh than ba ngin ïa beh ïa ki,” ula bynrap.
U Bah Roykupar ula ong, “Namar kata to ngin phikir bha bad pyneh beit triang ba ym dei ban ailad ba kin wan buhai shnong la kum ki phetwir ne ki nongwan sah shipor ha kane ka Ri baieid eh ka jong ngi”. “Tur Shaphrang Shipai ka Ri,” la pynkut u Bah Roy.
