Bthah ka High Court ban ïatrei lang ka sorkar jylla bad sorkar pdeng ban pynheh ïa ka Shillong Airport

Shillong, Naitung 29 : Ka ïing bishar High Court jongka jylla ka la bthah ïa ka sorkar jylla ba kan ïatrei lang bad ka sorkar pdeng na ka bynta ban pynheh ïa ka Shillong Airport kaba ha Umroi khnang ban lah hiar ki liengsuiñ kiba kham heh ne kiba heh ruh.
Haba shong bishar halor ka PIL mynta ka Lah Sngi U Blei, ka division bench kaba kynthup ïa u Chief Justice S Vaidyanathan bad Justice W.Diengdoh la pynpaw “ Na ka liang jongngi hadien ba ngi la ïoh ban ïakren bad ki nongtrei ka AAI, ki pilots, ka long kaba biang bad lah ban hiar ki Liengsuiñ kiba kham heh nalor ki ATR ha kane ka runway kaba 6000 sq.ft jongka Shillong Airport, ki kor ki bor ba ki pilot ki donkam ba ka sorkar kan pynbiang ka long ban buh ïa ka Visual Landing System, ban ai jinghikai pyntbit, ban pynbiang lut ïa ki jingdonkam da kaba ïatrei lang bad ka sorkar pdeng”.
Kumta halor kane ka ïing bishar ka ngeit skhem ba ka sorkar jylla kan ïatrei lang bad ka sorkar pdeng ban thaw lad kumno ban pynheh bad pynïar ïa ka Shillong Airport namar ym dei tang ba ka wanrah ka jingmyntoi ïa ka jylla hynrei khamtam eh ïa ki paid nongshong shnong.
Ha ka jingleit jurip jong ki nongbishar sha ki kad liengsuiñ ha Leh bad ha Port Blair “ Ngi ki nongbishar kiba leit jurip ïa kitei ki kad liengsuiñ bad ïa kynduh ruh ïa ki nongmihkhmat na ka AAI haba ngi la twad jingmut na ki kumno ban pyntreikam ruh kumjuh ha Shillong Airport, ki Pilot hi kiba ïathuh ba ka jingpynhiar ïa ka liengsuiñ bad ka jingpynher ha kadliengsuiñ Leh ka long shisha kaba eh bad shitom bha namar ka don hapdeng ki lum Himalaya hynrei namar ba ka biang palat ki kor ki bor ne ka Visual Landing System kumta kam shym la buh jingeh pat ïaki ban hiar bad pynher ïa ka liengsuiñ”.
Kumta lada ïa nujor bad ka kad liengsuiñ ha Leh, ka jinghiar jong ki liengsuiñ kiba kham eh ka dang biang ha Shillong Airport bad tang kawei ka jingeh kaba long kum ki diengpynkiang ban pynheh ïa ka kad liengsuiñ ka dei ka bynta jongka Cluster I kaba jngai kumba 5 km ei ei na ka Runway.
“ Hooid ngi khlem khapbrip halor ki jingshisha kata ban pynheh ïa ka kad liengsuiñ donkam shisha shibun ka pisa ban pynlut bad ka dei tang ka buit treikam jongka sorkar hi. Ka shong beit ha ka mon jongka sorkar bad ki nongsynshar jongka ban pyrkhat na ka bynta ka bha ka miat jong ki paid nongshong shnong namar lada treikam ka kadliengsuiñ ka jingmyntoi bad jingïoh nong kan long ïa ka jylla hi”.
Ki nongbishar ki la ong shuh shuh “ Ngi la tip shaphang kawei ka jingjia ïa kaba la saphriang bha ha ki kot khubor kata ha ka por ba u Dr APJ Abdul Kalam u dang long u President ka ri. Ha u 20025 u la leit jngoh ïa ka Mizoram bad haba u la dep ki kam ki jam u la kwah ban leit phai noh sha Delhi ha ka por miet bad la ïathuh ïa u ba ym lah ban pynher ïa ka liengsuiñ mynmiet bad hap ban ap haduh ka por step. Kane ka jubab ka la pynbitar ïa u, u la hukum ban pynbiang lut nadong shadong namar u hap beit ban mih ha ka por miet. Ki nongpynïaid ka kad liengsuiñ kim donlad shuh da kumwei ki la pynmeh ïa ki sharak ka runway, ki la thang ïa ki dong musa bad ïa ka ding ban shai khnang ba ka liengsuiñ kan lah ban her. Kumta haba don ka mon ka don ka lad ka lynti”.
La ïohi ruh ba ki don arjait ki nongtrei sorkar la ka long ha kano kano ka jaka ruh, ki don kiba ïohi jngai bad kwah ban pynurlong ïa kaei kaei kaba bha tam ki don pat kiba shu ïohi beit tang ïa kaba bym biang ne kaba sniew kiba shu kren beit tang ïa kaei kaei ka bym lah ban pynurlong, kumta ruh kiba bun hi ki heh sorkar ki phai beit tang sha kaba ym lah ban pynlong kam bad namar ba ki nongsynshar ki shaniah beit tang ha ki kumta bunsien ki shah ïalam bakla bad kim lah ban wanrah kano kano ka jingkylla na ka bynta ka bha ka miat ki paidbah.
Ka ïing bishar ka pynpaw ruh ba ka kam jngohkai ka dei kawei ka lad bah ban pynkamai spah ïa ka jylla Meghalaya, bad tang na kane ka kam ka don ka jingkhmih lynti ba ka jylla kan ïoh nong haduh INR 12,000 klur lada ki nongwan jngohkai ki poi 20 lak ha ka shisnem kat haduh u snem 2028. Kumta ban poi sha kane ka thong donkam ban pynbiang lut ïa ka leit ka wan na suiñ namar kiba bun ki kham beh ban leit jingleit da ki liengsuiñ namar ki poi kloi sha ka jaka ba ki kwah ban leit, ong ka ïing bishar.