Shillong, Nailar 11 : Ka ïing bishar High Court jongka jylla mynta ka sngi Palei ka la bthah ïa u Nongbishar ba la shongthait u Justice BP Katakey ban ai jingkheiñ katno u don u dewiong uba la dep tih lypa bad u ban lilam ha ka jylla Meghalaya.
ïa u Justice Katakey la thung da ka ïing bishar HC ban bud dien bad ai jingmut ïa ka sorkar ki ei kiba ka dei ban leh kat kum ka jingbthah kyndon da ka ïing bishar Supreme Court bad ka National Green Tribunal (NGT) kynthup ruh ïa ka jinglilam ïa u dewiong ba la dep tih.
Ha ka jingshong bishar da baroh ki nongbishar hapoh ka jingïalam u Chief Justice Sanjib Banerjee la bthah ba ka sorkar ka dei ban leh mar mar ban die lilam ïa u dewiong ba la dep tih namar ki la mih ki jingkynnoh na kiba bun ba ka jingtih dewiong beaiñ ka dang ïai bteng beit ha ka jylla bad la kynnoh pat ba une u dewiong ba dang tih u dei uto u dewiong uba rim.
“ Ha kajuh ka por u Justice Katakey u dei ban ai jingkheiñ katno u don u dewiong uba la dep tih hapoh ka jylla bad ka sorkar jylla ka dei ban ai ka jingïarap ïa u ban ïoh ïa ka jingkheiñ kaba bniah” ong ka ïing bishar.
La pynpaw ba tang shu ïoh jingkheiñ kaba biang yn sa pynthikna ba kan ym don shuh ka jingtih dewiong beaiñ. La bthah ruh ba ka sorkar ka dei ban siew 1.5 lak tyngka sha u Justice Katakey.
ïa ka kaiphod ba lai la aiti da u Justice sha ka ïing bishar ha ka 9 tarik Nailar 2022. La rai ruh ban ai kopi sha kito ki kynhun kiba ïasaid ïa ka mukotduma da kaba ki lah ban ïoh na u ophisar jongka ïing bishar.
Ka ïing bishar kan shong bishar biang halor kane ka mukotduma ha ka 25 tarik mynta u bnai.
