Bthah ka HC ïa ki Waheh Shnong Jowai ban kdew ïa ki jaka ban wan kit ñiut ki trok Municipal

Shillong, Jylliew 07: Ka High Court of Meghalaya ha ka sngi Balang ka la bthah ïa ka Synjuk Ki Waheh Shnong, Jowai ba kin kdew ïa ka jaka wan kit ki ñiut ki trok Municipal ha man ki kyntoit jong ka sor Jowai.
Ha ka hukum ba la pynmih ha ka sngi Balang ka Kashari jong ki arngut ki nongbishar u Ha ka hukum ba la pynmih ha ka sngi Balang ka kashari jong ki arngut ki nongbishar u Chief Justice ka HC u Justice Sanjib Banerjee bad u Justice W Diengdoh haba bishar ïa ka PIL ka ka la ong ba kumba long mynta ka kam kaba la ïaid shakhmat ha kaba ïadei bad u ñiut ha Jowai ka la ïaid ha ka lynti kaba i don jingkyrmen ban poi sha ka jingïamynjur lang. Ka la ong ba ha ka jingïakynduh lang ha ka 26 Jymmang 2023 hapdeng ka Jowai Municipality bad ki Waheh Shnong ka la lah ban wanrah sha ka jingïamynjur lang ha ki katto katne ki bynta.
Na ka liang ka Jowai Municipal Board ruh ka la mynjur ban pynkylla ïa ka por wan lum ñiut bad kumjuh na ka liang ka Synjuk Ki Waheh Shnong, Jowai ka la mynjur ban kdew ïa ki ar ne lai tylli ki jaka ban wan lum ñiut ha ki dong ki kyntoit ka sor Jowai.
Ha ka jingshisha na bynta ban kdew ïa ki jaka ba ki trok kit ñiut kin wan ieng ba ki paidbah kin ioh bret ïa u ñiut jong ki naduh ka 31 Jymmang 2023 hynrei na ki katto katne ki daw kane ka kam kam shym la lah ban pyndep.
“Ka Synjuk Ki Waheh Shnong, Jowai ki dei ban kdew ha kino ki jaka ba ki trok kin wan ïeng ban shim ïa u ñiut na u paidbah khnang ba ka Municipal Board kan lah ban pynbiang ïa ki trok kat kum ka sngi bad ka por ba la buh ba kin wan kit ñiut,” ong ka hukum.
“Nalor kane, ki shnong ki dei ban thung uwei u briew bad kin ai ka kyrteng bad u moblie number khnang un soi ha ka register ha ka sngi ba kine ki trok ki wan lum ñiut khnang ban lag ban pynthikna ba kynruh kynram kan ym mih hadien habud bad ïa kane dei ban pyndep noh mynta hi ka taïew,” ong shuh shuh ka hukum.
Ka kashari ka la bthah ruh ba lada don kino kino ki jingpynbna ne jingpyntip ba dei ban poi sha ki nongshong shnong ka Municipal ka dei ban phah beit sha u President ne Secretary ka Synjuk Ki Waheh Shnong Jowai.
Na ka liang ka HC ka la buh por ban shim bishar biang ïa kane ha ka 5 tarik Naitung 2023.