Bthah ka HC ïa ka Sorkar Jylla ban shim rai ïa ka jingshim jaka ban pynheh liengsuiñ

By Mawphor Editor On May 1, 2025

Shillong, Ïaïong, 30: Ka Iingbishar Meghalaya High Court ha ka sngi Balang ka la bthah ïa ka Kynhun Myntri jong ka Sorkar Jylla ban shim rai halor ka jingtyrwa ban shim jaka da ka ‘private treaty’ na ka bynta ban pynheh ïa ka Shillong Airport.
Ka bench kaba kynthup ïa u Chief Justice IP Mukerji bad u Justice W Diengdoh ha ka hukum la ong, “ngi kyrpad ïa ka kynhun myntri ban mynjur kham kloi ïa kane ka jingtyrwa halor kita ki kyndon kiba ka ñiew ba ka long kaba biang eh ban pynstet noh ïa ka jingpyndep ïa ka kam.”
“Ngi bthah ïa ka kynhun myntri ban shim ïa ka rai jong ka hapoh lai taiew naduh ba la ïoh pdiang ïa kane ka hukum bad lada ka ka rai ka biang ban shim jaka da ka Private Treaty, ka jingshimti ïa ka jaka kaba 11.7 akar dei ban pyndep noh hapoh ka phra taiew,” la bynrap.
Baroh ka jaka ba donkam ban pynheh bad ban shna ïa ka kad liengsuiñ ka long kumba 22 akar, ha kaba 10.3 akar yn shim na ka jaka shipai bad 11.7 akar na ki riewshimet.
Ka tnat Defence ka long kaba la pynkhreh ban aiti 10.3 akar sha ka Airports Authority lyngba ka Leave and Licence Basis.
U Deputy Solicitor General u la aiti ba kaTender kaba shongdor T. 150 klur la pynmih na ka bynta ka jingshna ïa ka jingpynheh ïa ka kad liengsuiñ.
Naduh ka tarik ba la pynrung ha ka soskular kan shimpor 18 bnai eiei ban pyndep pura ïa ka jingshna.
Ïa ka Environmental Clearance ladep ïoh na ka Ministry of Environment. Shuh shuh u Director General of Civil Aviation u donkam tang ban ïoh jingmynjur ïa ka jingtyrwa.
Shuh shuh, ka Bench ka la bthah ïa u Director General of Civil Aviation bad ïa ka Ministry of Environment ban ai jingmynujur ïa ka Plan ban shna pynheh ïa ka Shillong Airport.
“Hadien ba la ïoh ïa ka jaka bad dep khot ïa ka Tender na ka bynta ban shna ïa ka kad liengsuiñ ba thymmai, yn ym don shuh ka lad na ka bynta u Director General of Civil Aviation lane ïa ka Ministry of Environment ban pynsangeh ïa ka jingmang pisa na ka bynta ban pynheh ïa ka kad liengsuiñ,” ka la ong haba bthah ruh ïa ki bor ka Sorkar Pdeng ban kham pynstet ïa kam khnang ba kane ka por ba la buh yn dup lah ban kham pynlyngkot bad ban dup lah ban pyndonkam noh ïa ka kad liengsuiñ shwa ar snem.