Nongpoh, Rymphang 04: Ki nongïalam jong ka HYC, Ri-Bhoi Sepngi haka sien kaba 3 mynta ka sngi kila leit ban pynkynmaw biang ïa u Deputy Commissioner ka Ri-Bhoi District ban shimkhia mardor bad ban pyrkhing ïa ki kali kitkhia ban ïaid lyngba ka jingkieng Lailad kaba la synjor bad buh jingma ïa ki paidbah ba leit ba wan, khamtam ki phew tylli ki shnong ka thaiñ Ri-Bhoi Sepngi namar dei tang katei ka jingkieng kaba pynïasoh ïa ka thaiñ Ri-Bhoi Sepngi bad lada katei ka jingkieng kan hap kan long ka jingma bad ka jingktah kaba khraw ïa ki paidbah ba leit ba wan lyngba ka surok Umling-Patharkhmah.
Haba ïadei bad kane ka jingma kaba ap ïa ka jingkieng Lailad na ka liang ki nongïalam ka HYC Ri-Bhoi Sepngi mynta ka sngi hapoh ka jingïalam u Bah RC Thangkhiew kum u President haka jingsynran lang u Samla Tony Shylla General Secretary ka HYC Ri-Bhoi, kila leit ban ai biang da ka dorkhar sha u DC ka Ri-Bhoi ban pynkynmaw biang sa shisien ïa katei ka jingdawa ba ka seng ka la buh khnang ba ki bor district kin pyrkhing ïa ki kali kitkhia ban ïaid lyngba ka surok Patharkhmah-Umling, kumba kane ka dei ka sien kaba lai ba ka seng ka la leit ban ujor sha u DC.
U Bah RC Thangkhiew haba kren ha katei ka sngi hadien ka jingïakynduh bad u DC u la pynpaw ba kum ka seng ka la ju pynsngew sha u DC halor kane ka mat bad ka jingma kaba ap ïa ka jingkieng Lailad lada ki kali kitkhia ki ïaid lyngba katei ka jingkieng bad kane ka dei ka sien kaba 3 ba kum ka seng kan pynkynmaw biang namar haduh mynta ym pat don kano kano ka jingshimkhia na ka bor district ban pyrkhing ïa ki kali khia khamtam ki trok.
U la ong ruh ba lada ka sorkar bad ka bor district kim shimkhia eiei na ka liang ka seng kam banse ban pynieng hi da ki dkhot ha katei ka jingkieng ban khanglad ïa ki kali kit khia kiba palat ka 9 ton ban ïaid lyngba katei ka jingkieng, u la bynrap.
