Shillong, Naiwieng, 08: Ki Pulit jong ka Sadar Police Station ki la bteng ban khot hajir ïa ki nongïalam jong ka Federation of Khasi Jaiñtia & Garo People (FKJGP) hadien ba ka la mih ka jingshah thombor jong ki nongïaid lynti na ka jingpynlong ïa ka rally pyrshah ïa ka jingkyrduh kam ha ka 28 tarik u Risaw 2022.
Ka tnat Pulit ka la register case ïa ki nongïalam ka FKJGP hapoh Sadar Police Station bad ha Laitumkhrah Police Station halor ka jingshah shoh ki nongïaid nongieng ha ka thaiñ Police Bazaar, Malki bad Dhankheti bad ka jingshah pynjulor ki kali ha ki nongïaid rally ba la pynlong da ka FKJGP
Mynta sa u Vice President ka FKJGP u Bah Kitboklang Nongphlang bad u Chief Organising Secretary u Bah Khrawkupar Nongsiej ki la shah khot hajir ha ki Pulit hja Sadar Police Station ha kaba la pynngat ïa ki ha kijuh ki Case ba la pynngat ïa u General Secretary u Bah Eldie N. Lyngdoh bad ïa u Senior Vice President u Bah Elton Cliff Warjri.
Ïa u Bah Kitbok Nongphlang la phah wan hajir ha ka 10 tarik mynta u bnai ha Sadar Police Station ha ka por 10 baje mynstep katba ïa u Bah Khrawkupar Nongsiej la phah wan hajir ha ka por 2 baje nohphai sngi.
Ha ka sngi Lah sngi U Blei bad ha ka sngi Baar mynta ka taiew, ki Pulit ka Sadar Police Station ki la khot hajir ïa u Chairman jong ka Awakening Indian Movement (AIM) Meghalaya Chapter u Bah Banshai Marbaniang bad ïa u President jong ka Ri Bhoi Youth Organisation (RBYO) u Bah B. G Lapang ha kaba ïadei bad ka jingïashim bynta lang jong ki ha ka jingleit tur paidbah jong ki nonghikai skul Kontrak sha ophis Main Secretariat ha ka 6 tarik u Risaw, 2022 kaba la pynlong ïa ki Pulit ban kawang da ki bom pynsat khmat.
Ha ka jingïakren bad ki lad pathai khubor hadien ba la mih na Sadar Police Station, kine ki arngut ki nongïalam sengbhalang ki la kyntu ïa ka tnat Pulit ba kan pyndep noh kham kloi ïa ka jingtohkit khnang ba ki nonghikai skul kontrak kin dup ïoh ïa ka jingbishar kaba hok halor ka jingshah kawang da ki bom pynsat khmat ha ka jingleit tur sha ophis main Secretariat ryngkat bad ki khun ki kti.
