Baghmara, Risaw 20: Kum shi bynta ban pynkiew ïa ka ïoh ka kot bad ka rukom im ha ki thaiñ nongkyndong, ka sorkar jylla hapoh ka jingïalam u myntri Rangbah ka jylla, u Conrad K Sangma mynta ka sngi u la sam ia ki jingri sha ki nongrep, nongseng kam bad ki samla ha Baghmara, South Garo Hills.
U Myntri Rangbah ka jylla u Conrad K Sangma, u la sam pisa kaba kot T 9.87 lak hapoh ka skim ‘FOCUS+’ Farmer’s Welfare Programme ban pynïoh nong ia 987 tylli ki longing.
La sdang ia ka ‘FOCUS+’ da ka jingthmu ban pynioh nong ia ki ba bun ki longing ha ka jylla. Hapoh ka ne ka skim la phah jingïarap pisa T. 5,000 tyngka man ka thliew ïing, lyngba ki bank.
Shuh shuh, hapoh ka Rural Backyard Piggery Scheme, ‘PROGRESS’, 1000 tylli ki khun sniang (3 tylli ki sniang kynthei bad uwei u sniang shynrang) la sam sha ki 250 ki longing nongrep na South Garo Hills District. Bad La sam ia ki syiar Kroilar sha ki 30 ngut ki ba dei hok.
Ka skim ‘PROGRESS’ ka buh ïa ka thong ban pynneh pynsah ïa ka rukom kamai ja kpoh jong ki nongrep lyngba ka jingri ia ki mrad iing. Na kane ka skim, la mang ban ïarap kumba 10,000 ngut ki nongrep ki ba duna jingioh da kaba pynkhlaiñ ka rukom ri bad khaïi sniang bad syiar.
Ka jingai jingïarap lyngba ka YESS Meghalaya sha ki seng samla ka dang ïai bteng da ka jingai jingiarap ba T 4.8 Lak tyngka sha ki 11 tylli ki seng samla Garo ba la sam da u myntri Rangbah ka jylla. Ka skim YESS ka dei ka skim ba la sdang ban pynim bad pynshlur ia ki samla ban sdang la ka kam lajong.
Haba kren ha kane ka ka program, u Myntri Rangbah ka jylla u la ong: “Ka jylla Meghalaya ka dei ka jylla ba im da ka rep ka riang; kumta ka jingpynkiew ia ka kam rep ha ka jylla ka long ka thong ka ba ha khmat eh jong ngi”. Hapdeng kine ki 4 snem shiteng, ka sorkar ka la leh shibun ki kam pynroi ha ka liang ka rep ka riang ka ba la wanrah shibun ki jingkylla. Kata ka long da ka jingphah ïa ka pisa sha ki nongrep, ki samla, ki Self Help Group, ne ka jingsam ïa ki jingri jingdup,, baroh kine ki dei ki jignleh jingkam ban pynroi ia ka ioh ka kot ki nongrep ha ka jylla.
