Nongstoiñ, Naiwieng, 2: Bun ki paitbah kiba la ïoh pdiang ïa ki sniang ha ka sngi ba u Conrad Kongal Sangma Myntri Rangbah ka jylla u la wan ha Nongstoiñ, ki la babe namar ba tang hadien ar taïew ki sniang ha bun tylli ki shnong ki la ïap bad ki don ki nongshong shnong ki bym shym la tep ïa ki sniang kiba ïap, hynrei ki shu bret ha ki khlaw bniap harud nong bad na katei ka jingleh jong ki, kiwei pat ki sniang ki bym dei kiba la sam da u Myntri Rangbah ki la kem pang ban bun ki la ïap.
U bah S.Marngar haba pyntip ha u nongthoh khubor ,u la ïathuh ba u la ïoh jingtip ba ha tang ha ki shnong kiba hap hapoh ka Nongstoiñ Town Area, ki sniang kiba la ïap ki la don palat ar phew tylli haduh mynta ka sngi. Ki don pat ki rangbah kiba la ong ba katkum ka jingtip jong ki, ka jingwan sam sniang jong u Myntri Rangbah ha Nongstoiñ, ka dei tang na ka bynta kito ki briew kiba don ki ïing building ba bun mala, kiba don la ki kali private ban leit kylleng kylleng.
Hynrei kiba dei hok ki nongri jingri la ki dei ki nongri sniang ne ki nong ri syiar, don tang katto katne ngut kiba ïoh. Hynrei ka nusib jot ka lap pat ïa ki ba ki sniang ba ki shu ïoh ei kim shym la im wat tang shi bnai ruh.
Haba pyrshang ban twad jingmut na ki riew paitbah, ki nongshong iew shong hat bad ki nongshong shnong kiba la ïoh pdiang ïa ka skhim sniang na u Myntri Rangbah, don kiba ong ba haba shu ai ei te pdiang beit katba ai, namar ka sorkar ka dei hok ban ai ei.
Lada ki paitbah kim thep vote yn ym lah ban don sorkar bad haba ki leit thep ïa ka vote jong ki shisien man ka san snem ki leit thep khlem bai nong bad ha ka jingshisha uwei u sniang khun ba u Myntri Rangbah u wan sam sha ki paitbah Nongstoiñ lada shu thied u shong dor san haduh hynriew hajar tyngka.
Don ruh kiba ong ba lada kawei ka longïing kaba ïoh sniang ka don ar ngut ki khun kiba la leit bylla man ka sngi ha ka dor saw spah tyngka shi sngi ki ïoh lum shi hajar ar spah tyngka shi sngi bad ha ka shi bnai katno kin ïoh lum.
Ha kajuh ka por ki la ong ba lada ki paitbah ka Nongstoiñ ki sngewthuh, kim dei ban shah pynïaryngkat dor ïa ka longrynïeng jong ki bad u sniang khun, namar ha kine ki sngi lada kum bakla ha kaba ïakren kai shi paralok ruh la shah kynthoh ba ki dei biej sniang.
