Bluit, mih ka kyrteng u Bah Hamlet kum u kyrtong ka NPP na Mylliem ha u 2023

Shillong,Naitung 06 : Ki nongïalam ba hakhmat jong ka National People’s Party(NPP) hynne ka sngi Saitjain ki la pynpaw pyrthei syndon ba u MLA ba mynta jong ka People’s Democratic Front (PDF) na Mylliem, Bah Hamlet Dohling un sa ïakhun noh na ka NPP ha ka elekshon MLA kaban long ha u snem ban wan.
Ïa kane, kitei ki nongïalam ba kynthup naduh u Bah Bajop Pyngrope, Nongai ktien ka NPYF kumjuh u MLA ka Nongstoin ba dei ruh u President ka NPP West Khasi Hills, Bah Macmillan Byrsat, ki la pynpaw ha ka jingïalang kaba long ha Mylliem 11 Mer.
Ha katei ka jingïalang, ka NPP ka la pdiang burom ïa ki spah ngut ki nongïalam na ki party bapher bapher kynthup naduh na ka PDF, Congress, UDP bad na kiwei ki party. Na ka liang u Bah Macmillan u la pynskhem ruh ïa ki nongkitkam jong ka NPP Mylliem ryngkat ka jingkyrkhu kyrdoh ba kin trei borbah na ka bynta ka elekshon kaban long ha u 2023.
“Ngi sngewthuh shai mano ba dei kyrtong. Ngan ïathuh beit ba dei u Bah Hamlet Dohling watla im don hangne hynrei ngi sngewthuh shai ba in ïakhun beit na ka NPP,” ong u Bah Bajop.
Shuh shuh u ong ruh ba kane ruh ka jia kumjuh ba ha Rambrai u kyrtong ban ïakhun un dei u MLA Bah Kimfa Marbaniang uba dei u MLA ba shah sospon ha ka Congress.
Na ka liang u Bah Bajop u la ong ruh ba ka sah mynta sa tang kumba 6 haduh 7 bnai na ka bynta ki nongtrei jong ka party ban duh thiah duh dem ban pynkhreh na ka bynta katei ka elekshon ban pyntikna ba u kyrtong jong ki un jop biang ha ka elekshon ban wan.
Na ka liang u Bah Macmillan haba bynrap lang u la ong ba u kmen haduh katta katta ban tip ba u Bah Hamlet un wan ban ïakhun na ka NPP ha ka elekshon ban wan. U la ïathuh ruh ba ha kiba ki khep u ju wer ïa utei u MLA ban leit ïa kren lang bad ka sorkar na ka bynta ki ishu kiba ïadei na ka bynta bad khamtam na ka bynta ka Jaidbynriew.
“Haba don ki kam ban leit kynduh ïa u Myntri Rangbah nga ju leit ban khot ïa u Bah Hamlet ban ïa leit lang khamtam haba ïadei bad kawei ka ishu kaba ngi donkam ban ïathuh bad pynsngewthuh ïa u Myntri Rangbah na ka bynta ka jingdonkam jong ka jylla jongngi. Nga ngeit ba ngi la ïohi ïa ki dak ki shin ki la paw shai ba u ei uban dei u kyrtong jongngi na Mylliem. Watla ka por kam pat poi hynrei kumba la ong ki nongïalam ba shakhmat u kyrtong hi un dei MLA jongphi ba mynta,” bynrap lang sa u Bah Macmillan Byrsat.
La ïoh ruh ïa ka jingkren na u Prof Don War, Working President ka State NPP bad ruh na u Bah Aibor Tynsong General Secretary ka NPP East Khasi Hills kiba la pynpaw ïa ka jingkmen kaba khraw ban ïohi ba ka NPP ha Mylliem ka la kiew stet haduh kattei kattei bad ïoh ruh ban khring ïa bun ki nongïalam na kiwei ruh ki party.