Tura, ïaïong, 12: U MDC jong ka Tura u Bernard N. Marak ha ka sngi Baar ula kynnoh ba ki samla ki dap da ka jingbitar naba ki Bank kim ai jingïarap satia ban airam na ka bynta ban sengkam sengjam.
“Bun na ki samla ki dap ka jingsngewsih. Ki skhim ka sorkar pdeng kiba la thmu ban ai jingïarap sha ki samla lyngba ka ram kim ïoh jingïarap satia na ki Bank. Ki samla ki pynpaw ïa ka jingbitar. Kane ka pynïap noh ïa ka jingangud jong u Myntri Rangbahduh ka ri u Narendra Modi ban ïarap ïa ki samla ha ka sengkam sengjam,’ ong u Bernard.
“U Narendra Modi u la pynbna paidbah ïa ka Self Reliant India ban kyntiew ïa ka ri India hynrei bun na ki samla ki khnium ba kim ïoh satia ïa ki song jingïarap ba la mang kyrpang na ka bynta ki samla ki bym donkam donjam wat hadien ba ki la ïoh ïa ka jingthoh ba la ai jingmynjur da ka tnat Karkhana, na ka KHADI, na ka MSME ha kaba ki Bank ki aidaw ba ym don satia ki song jingïarap ba la mang na ka bynta ki samla khlem kam,” u la ong.
U la ong ba ka BJP kan sa pynlong ïa ka jingpynshai paidbah shaphang ki skhim kiba wan na ka Sorkar Pdeng ïa kiba la mang kyrpang na ka bynta ki samla kiba angnud ban ieng ha la ki jong ki kjat.
