Bitar ki paidbah ba khlem ioh buh jingkylli ïa u Bah Rangkynsai ba phet tang shiteng naka Common Platform

Nongpoh, Rymphang 17: Kiba bun naki paidbah kiba la wan ban sngap ïaka Common Platform jong ki kyrtong MDC ha Liarshluid bala pynlong da ka Synjuk ki 5 shnong, kiba kwah ban buh jingkylli ïaki kyrtong jong ka Umroi Constituency kila pynpaw ka jingbitar ba kim ioh ban kylli ïakaba ki kwah bad thmu khamtam ïa u Bah Rangkynsai Kharbuki u ba dei u MDC ka Umroi namar ka jingphet noh jong u tang shiteng na ka jingïalang.
Kum ban shu kdew hangne ba naka liang u Returning Officer jong ka 5 Umroi District Council Constiteuncy u la ai jingbit ban pynlong ïaka jingïalang naduh ka por 11 baje mynstep haduh ka por 12:30 janmiet, hynrei u Bah Rangkynsai tang hadien ka jingkren pynshai ïala ka nongrim u la phet noh na katei ka jaka ban aidaw ba u don jingïalang sa shawei pat bad iehnoh satang ïa u Bah George B Lyngdoh marwei kumba ha katei ka rynsan napdeng 5 ngut ki kyrtong MDC jong ka Umroi Constituency la wan poi tang u Bah George B Lyngdoh kyrtong shimet bad u Bah Rangkynsai Kharbuki kyrtong ka NPP.
Naka liang katto katne ki paidbah kila pynpaw ruh ba kane kam dei ka rynsan tang ban ïalap elekshon ki kyrtong hynrei ka dei ka rynsan ïathir ïatai bad kum ki paidbah ruh hadien ba ki kyrtong kila dep ban pynshai ki kwah ban buh ïaki jingkylli halor ka nongrim kaba ki thmu ban shakri ïaki paidbah, hynrei kaba sngewsih ka long ba ki paidbah kim iohlad satia ban kylli ïa kaba ki thmu khamtam ïa u MDC ka Umroi u Bah Rangkynsai Kharbuki baroh ki jingkylli la hap ban jubab tang u Bah George Lyngdoh marwei.