Shillong, K’ Lyngkot 23: U dkhot jong ka Parliament, na 2-Tura Parliamentary Constituency u Saleng A Sangma u la pynïaid ïa ka jingïalang jong ka District Development Coordination and Monitoring Committee (DISHA) kaba la long ha ka sngi palei hapoh DRDA Conference Hall, DC Office, Tura ban khmih bniah halor ka kaiphod bad ki jingpyntreikam ïa kiba bun ki skhim jong ka sorkar pdeng kiba la nohsynniang napoh ka Ministry of Rural Development bad kiwei pat ki Ministry ha West Garo Hills District.
Ha ka jingkren sdang u Saleng Sangma u la ong ba da ka jingkhmih bniah ïa kine ki skhim ka long kaba kongsan ban pynthikna ïa ki jingpyntreikam ïa ki skhim jong ka sorkar pdeng na ka bynta ka bha ka miat jong ki paidbah bad ka ïoh ka kot jong ka thaiñ. Na ka liang jong u, u la ai jingmut ba ki jingeh ba la mad haba pyntrei ïa kine ki skhim la pynpaw hapoh ka jingïalang bishar kam bad haba la kyntu ïa ki tnat bapher bapher ba kin ïatreilang da kaba shit kaba shai ha baroh ki kyrdan.
Ha kane ka jingïalang bishar kam ki tnat bapher bapher ki la pynpaw ïa ka kaiphod ha kaba ïadei bad ka jingpyntreikam ïa ki skhim da ki tnat bapher bapher ha la ki jong ki district.
Kine ki skhim ka sorkar pdeng ki kynthup ïa ka MGNREGS, PMAY, National Social Assistance Scheme, NRLM hapoh ka District Rural Development Agency (DRDA), MPLADS da ka Development Branch, Swachh Bharat Mission, DDU-GKY, Implementation of Food Security Act da ka tnat Supply, PMEGP da ka DCIC, RKVY bad PMKSY da ka tnat Agriculture, ICDS, RBSK hapoh ka National Health Mission da ka tnat ka Health & Family Welfare, Sarva Shiksha Abhiyan, Midday Meal scheme, PMGSY bad Highways da ka tnat PWD, PMKSY kaba dei ruh kaba la pyntreikam da ka Soil & Water Conservation and District Water Resources, nalor kiwei kiwei pat ki skhim.
Ha kane ka jingïalang Deputy Commissioner, West Garo Hills Jagdish Chelani, SDO (Civil) Dadenggre Civil Sub Division, Sumeet Singh, District Planning Officer, Nippon Hajong, Additional Deputy Commissioners, MLA barim Ferlin C A Sangma, Greaterson Arengh, ki ophisar jong ka West Garo Hills District, ki heh ophisar jong ki tnat bapher bapher nalor kiwei pat ki la shim bynta ha kane ka jingïalang.
