Shillong, Lber 1 : U Chief Information Commissioner (CIC) jongka jylla u bah H.Nongpluh u la ïathuh ba ka jingpyntreikam ïa ka Right to Information (RTI) ha ka jylla Meghalaya ka biang palat namar ka don ki First Appellate Authority (FAA) bad Public Information Officials (PIO) kiba tbit.
Haba kren sha ki lad pathai khubor mynta ka sngi hadien ka jingïalang halor ka RTI Act Programme, u bah Nongpluh u la ïathuh ba kham niar ba ka Commission kan ïoh ïa kino kino ki jingujor ne case namar la dep pynbeit bad pynkhuid ïa ki case ha ki kyrdan jong ki PIO bad FAA.
“ Kumta nga lah ban ong ba ka jingpyntreikam ïa ka RTI ha ka jylla Meghalaya ka long kaba biang namar kat haduh mynta kham niar ba ki case kin poi shaduh ka Commission namar la pyndep ne pynkhuid beit ïa ki ha ki kyrdan jong ki FAA bad PIO bad kane ka pynpaw ba ki pyndep hok ïa la ka jongka kamram ba la bynshet ha ki” ong u bah Nongpluh.
U bah Nongpluh u la ong ba ka RTI ka dei ka aiñ kaba la pyntreikam ha u 2005 kaba la pynkup bor ïa ki paidbah ban wad ïa ki jingshisha bad lyngba kane ka aiñ kiei kiei ki paw shai kdar lut namar ki paidbah ruh ki ïoh jingtip bniah beit halor kino kino ki kam ba ki wad jingtip lyngba ka RTI.
U la ïathuh ba ka Section 4 ka dei ka kyndon kaba aibor ïa ki tnad sorkar ba kin ai ka jingpynshai halor kino kino ki kam bad dang shen ka ïing bishar Supreme Court ka la pynmih ka hukum ba baroh ki tnad sorkar ki dei ban ai jingtip shai kdar hi sha ki paidbah.
Ha kawei pat ka bynta u bah Nongpluh u la ong ba tang kawei kaba sngewkhia jur ka long ba kane ka aiñ ka khlem kren ei ei pyrshah ïa ki briew kiba pyndik ne pynshitom ïa ki ophisar.
U la ong ba kam don ei ei ha kane ka aiñ kaba kren shaphang ka jingshah nion ne shah thombor ki ophisar bad dang shen ha ka conference jongki CIC la ïakren halor kane ka mat bad la rai ruh ba ym dei da lei lei ruh ban ailad ïa kiba kum kita kin jia.
“ Dang shen ha Gujarat nga tharai ki don haduh palat 1000 tylli ki aplikeshon kiba la shah kyntait namar ki tip shai ba ïa uta u briew la nion beit kylleng kylleng bad don ruh kiba shim kabu ban ïoh pisa na kane ka aiñ. Nga tharai ki Commissioner ki dei ban kynmaw bha ïa kane bad kumjuh ruh wat ki PIO bd FAA ruh. Wat la kam pat don kano kano ka kyndon hynrei ngi la ïa mynjur lang ba baroh ki ophisar kim dei ban shah nion khamtam da kata ka jingthmu ban pyndonkam bakla ïa ka aiñ” pynkut u bah Nongpluh.
