Nongstoiñ, Nailar, 13: Ka KSU Mawshynrut Circle lyngba ka organising committee ba la ïalam da u samla Anselm Ryntong Organising secretary ha ryngkat ka jingsynran jong u Assistant Organising secretary samla Korbar Myrthong bad ki dkhot, ka la ïoh ban bat ïa 4 ngut ki bar jylla kiba thmu ban wan treikam sorkar ha Post office.
Ka seng ka bynrap ba ka jingbat ïa kine ki bar jylla ka long halor ka nongrim ba kyrduh kam ki trai ri trai muluk la ka dei ha ki kam private service ne ha kam sorkar. Kaei kaba kine ki bar jylla kim long ban wan trei sha kane ka thaiñ ka dei namar ba kim nang ban kren ktien Khasi.
Kum ban shu pynkynmaw ba ka KSU seng kmie ka la ai ïa ka dorkhas sha u CM ha ka 20 tarik u Naitung 2023 ban pan ïa ka bhah na ka bynta ki Khasi. Hynrei ka seng ka sngew lyngngoh hadien ba ïoh ban tip na kine ki bar jylla kiba mut ban wan trei ha thaiñ Mawshynrut.
Kane ka jingsngap mynthi ka sorkar ïa ka jingthrang jong ki paidbah ban ai kam ai jam ïa ki trai ri trai muluk, ka pynlong ïa ka seng ban tuklar ha kaba ïadei bad kane ka mat.
Ka seng ka kyntu ruh ïa ki sordar shong jong ki shong bapher bapher ba kin phikir bha shwa ba kin ai ïa kino kino ki kot ki sla sha ki bar jylla, kaba ktah ïa ka jakpoh jong ki trai ri trai muluk.
Ka seng ka ai mynsiem ruh ïa ki samla khasi ba kin mih shakhmat ban apply ïa kine ki post ha Post office khnang ba kin ïoh ïa la ka jong ka bhah.
