Shillong, Nailar, 25: Ka Deputy Commissioner jong ka East Khasi Hills District ka Kong Isawanda Laloo ha ka sngi Palei ka la bate kam ïa ki Majistor kiba la shah bhah kam na ka bynta ban sorjamin ïa ki lynti ïaid kjat bad ïa ki rud surok ba la shong die jingdie da ki nongdie madan kiba la pynwit ïa ka leit ka wan bad ka ïaid ka ieng jong ki paidbah bad ki kali ha baroh kawei ka sor Shillong.
Katkum kane ka jingbate kam, ha ka thaiñ Motphran la bynshet ha u Bah Peter Passah, ADM bad ha u Bah Keith Nongsteng, EM ryngkat ka jingsynran lang jong ki Pulit, ki nongmihkhmat na ka tnat Pynroi Sor, na ka Shillong Municipal Board, u Bah GF Kharkrang u HDO na ka ophis District Horticulture Officer, u Bah W. Narry u Sub-Divisional Officer (SDO) na ka ophis Water Resources Sub Division, u Bah W.R.Lyngdoh u Executive Engineer na ka ophis PWD (Roads) National Highway Division.
Ha ka thaiñ Polo la bynshet ha ka Kong D. Kharshiing, ADM bad u Bah G. Dhar, EM ryngkat ka jingsynran lang jong ki Pulit, ki nongmihkhmat na ka tnat Pynroi Sor bad Shillong Municipal Board lem bad u Bah Alan Roy Jyrwa, EO na ka ophis Directorate of Employment & Craftmen Training, u Bah Wahid Nongbri, u EE na ka ophis Executive Engineer PHE, GSWA Div-I bad A. Laloo, IS na ka ophis Directorate of Economic & Statistics.
Ha ka thaiñ Police Bazar, Civil Hospital, IGP Point bad Barik Point la bynshet ha u Bah F. B. Basan, ADM bad u Bah Toshanbha Marweiñ, ryngkat ka jingsynran lang jong ki Pulit, ki nongmihkhmat na ka tnat Pynroi Sor bad na ka Shillong Municipal Board, u Bah Khrawborlang Nongdhar, Junior Engineer na ka ophis u Assistant Director BADO, W. Chyne u Inspector jong ka Legal Metrology bad L. Nongrum, u Labour Inspector, na ka ophis District Labour.
Ha ka thaiñ Laitumkhrah la bynshet ha ka Kong D.V. Lyngdoh, ADM bad u bah Silvester Phanbuh, EM ryngkat ka jingsynranlang jong ki Pulit, ki nongmihkhmat na ka tnat Pynroi Sor bad Shillong Municipal Board, G. Nongkynrih Scientist C na ka ophis NIELIT, K. Shylla, Junior Engineer (Mech) na ka ophis PWD (R) National Highway Division bad L. Syiem, ka Junior Karate Coach na ka ophis District Sport Officer.
Ha ka thaiñ Laban Last Stop la bynshet ha ka Kong H.M.L.Kynta, ADM bad ha ka Kong A.R. Kynta, EM ryngkat ka jingsynran lang jong ki Pulit, bad kynthup ruh na ka tnat Pynroi Sor bad Shillong Municipal Board, ) P. Nongrum, JCO na ka ophis Cooperative Society, A. Khonglam, Weaving Inspector na ka ophis u Zonal Officer Weaving Khasi & Jaiñtia Hills bad I. Rakhi Blah, SE-II na ka ophis u EE Urban Affairs.
Ha ka thaiñ Rynjah, la bynshet ha ka Kong M.S. Kshir, ADM ryngkat ka jingsynran lang jong ki Pulit, ki nongmihkhmat na ka tnat Pynroi Sor bad Shillong Municipal Board, J. S. Dkhar, Junior Engineer na ka ophis EE PWD (R) National Highway Division, Bypass, N. R. Kharshandi, Asst. Director na ka ophis Director Programmes Implementation and Evaluation bad M. L. Lawai, EE na ka ophis EE Water Resources.
Ha ka Madanrting Taxi Stand la bynshet ha u Bah R. Wahlang, ADM ryngkat ka jingsynran lang jong ki Pulit, ki nongmihkhmat na ka tnat Pynroi Sor bad Shillong Municipal Board, S. Shadap, FM na ka ophis General Manager District Commerce & Industry Centre, B. Warkhyllew, AO na ka ophis DTE Local Fund Audit bad Joy Rynjah, Junior Cooperative Officer.
Ka Deputy Commissioner ka la bthah ruh ïa ki Majistor ba la shah bynshet kam ban peit thuh ïa ki jaka ba khapngiah na ka daw ka jingdon jong ki nongshong die madan.
Ban pynbeit ïa ki jaka ba la kyntur da ki nongdie madan da kaba pynrit noh ïa ki jaka shong die jingdie lada ki la tam pud sha surok, ban pynthikna ba ka jaka shong die jingdie ka dei ban long kaba kylluid bad kiwei kiwei khnang ba ki nongïaid lynti kin ïoh jaka ïaid kaba kylluid bad kaba shngaiñ bad ban pynkylluid ruh ïa ki jaka ba dei ïaid ki kali.
Ban peit ïa kino kino ki jaka kiba kham i bang ban pynkynriah ïa ki nongdie madan.
La bthah ruh ban ïatreilang bad ki kynhun bapher bapher kum ka ophis u Syiem ka Hima Mylliem, ki Rangbah Shnong lada donkam. Dei ban khot ïakren lang ïa ki nongïalam jong ki nongdie madan bad ban pynshai ruh halor kane ka jingthmu.
Dei ban lum ka jingtip kaba bniah ïa ka jingdon jong ki nongshong die madan ha ki sngi ba la pynlong ïa ka jingsor jamin.
Ka Deputy Commissioner ka la bthah ruh ïa u Chief Executive Officer ka Shillong Municipal Board bad District Urban Planner ban synran lang ha ki sngi ba la pynlong ïa ki jingsorjamin.
La bthah ruh ban phah ïa ka kaiphod sha ka Deputy Commissioner ha ka 30 tarik mynta u bnai.
Baroh ki Ophisar kiba la shah bynshet kam ki dei ban ai jingtip sha ki Magistrate kiba ka Deputy Commissioner ka la pynkhamti kam.
