Khliehriat, Lber, 14: Ki Pulit jong ka East Jaiñtia Hills District ha ka sngi Thohdieng ha ka por 5:30 baje mynstep ki la ïoh jingtip lyngba ka telephone na NERS, Shillong ba ki don ar tylli ki kali Mahindra Thar kiba don ïa u nombar AS01FY 2524 bad u nombar AS01FL 8848 kiba la shah rong tuh bad kiba ïaid lynti lyngba ka shnong Umkiang, East Jaiñti Hills District.
Marmar ki Pulit jong ka Umkiang Patrol Post ki la pynap shrip ha ka shnong Damchera bad dei ha ka por 6:30 baje mynstep ki Pulit ki la ïohbat ïa ki ar tylli. Ha kine ki ar tylli ki kali ki hynñiew ngut ki briew ba kynthup ïa ki lai ngut ki shynrang bad saw ngut ki kynthei.
Ha ka jingtohkit jong ki Pulit ki lai ngut ki shynrang kim shym la lah satia ban ai ïa ka jubab kaba shai bad ki la pyni ruh ha ki Pulit da ki Aadhaar Card kiba shu thok. Kumta ki Ppulit ki la rah noh ïa ki hynñiew ngut bad ïa ki ar tylli ki kali sha thanat Umkiang na ka bynta ban pynlong ïa ka jingtohkit kaba bniah.
Hadien kane, ki trai kali ki la wan poi sha thanat Umkiang ha kaba ki la kam ba ki hynñiew ngut ki la shim wai ïa ki kali jong ki na nongbah Guwahati ban leit sha Shillong khlem kano kano ka jingpyntip bad da ka jingthmu ba sniew ki la pynduh ruh wat ïa u GPS ha kawei na kine ki kali bad ki la thmu ruh ban ïaid shaduh jylla Manipur lyngba ka jylla Mizoram.
Halor kane ka jingjia, ki trai kali ki la ujor da ka ejahar ha ki Pulit ka Dispur, Assam bad hadien ba ki Pulit na Umkiang ki la telephone sha u Officer Incharge ka Dispur u Krisna Jyoti Bhaskar u la kyntu ïa ki ban bat ïa ki hynñiew ngut kiba donkti kynthup ruh ïa ki kali khnang ba ki Pulit ka Dispur kin ïoh ban pynlong ïa ka jingtohkit kaba bniah.
Na ka liang ki Pulit jong ka East Jaiñtia Hills District ki la aiti noh ïa ki kali bad ïa ki hynñiew ngut ki briew sha ki Pulit jong ka Dispur, Assam.
