Shillong, Jylliew 19: Ki pulit ki la ïathuh ba u Nokma ka shnong Daronggre (SWGH) da ka ktien u la ïathuh sha ki pulit ba ha ka mied jong ka 15 tarik mynta u bnai, ki nongshong shnong ka Daronggre ki la ïoh bat ïa 2 ngut ki briew ba la ithuh kyrteng da Augur D Sangma ba la 24 snem ka rta bad u Jihu D Marak ba la 23 snem ka rta, katba ki dang ïaid bad ba la isuba sniew bym lah ban shaniah ha ka shnong ha kawei ka Maruti car kaba don u nombar ML-08D-7705.
Kham hadien ïa kitei ki arngut ha ryngkatlang bad ka kali bad 3 tylli ki mobile phone la aiti noh sha ki pulit.
Ha kawei pat ka jingjia ki pulit ki la ïathuh ba ha ka 16 tarik mynta u bnai ha ka por kumba 6 janmied uwei uba kyrteng u Subodk Kumar ba la 22 snem, la ong ba u la shah shoh ha la ki paralok ha jaka sah jong u kaba ha Pynthorbah Block-II, Shillong. Halor kane ka jingjia utei u lanot u la mynsaw bad la pynkit noh sha Civil Hospital Shillong.
