Shillong, Naitung 10: U CEM ka KHADC u Bah Pynïaid Sing Syiem u la ong ba ka jingdon jong baroh ki nongtrei ka KHADC ha baroh ki District ka la poi kumba 810 ngut ha kaba ha East Khasi Hills ki don 764 ngut, West Khasi Hills 13 ngut, South West Khasi Hills 16 ngut bad Ri Bhoi District ki don 16 ngut.
Ïa kane u CEM u la jubab ïa ka jingkylli ba la wanrah da u Nongïalam ka Liang Ïatei u Bah T W Chyne halor ka jingdon ki nongtrei hapoh ka KHADC lyngba ki district bapher bapher.
Haba kylli ïa ki jingtrei kam ki nongtrei ha ki District u ba Chyne la ai jingmut ruh badei ban pynkhlaiñ ha kiwei ki district namar haba peit ïa ka data ka pyni ba kiwei ki district kim treikam satia.
Halor kane u CEM u la ïathuh ba lait na ka East Khasi Hills, kiwei ki lai tylli ki district ki treikam hapoh ka Judiciary bad ka Professional Tax bad ki nongtrei kiba don hapoh ka Executive Wing ki long 630 ngut, hapoh ka Legislative Wing ki don 74 ngut bad hapoh ka Judiciary 61 ngut.
Haba pdiang ïa ka jingai jingmut u MDC ka Sohra u la ong ba donkam shisha ban pynkhlaiñ ïa ki branch office khamtam ba mynta ka jingwan register jaka ban ïoh ïa ka Land Title Certificate ka la bun bha, nangta ïa ka Trade kaba donkam ha Ri Bhoi District bad hadien ba la pyntreikam sa ïa ka Building Bye laws la nang donkam shuh shuh ban pynkhlaiñ ïa ki ophis ha ki branch.
Haba ïathuh ba hadien ba la ïoh sa ïa ka Eastern and West District ba la pynkha thymmai da ka sorkar jylla la hap ban buh ophis sa kane ka district kumta hap pynkhlaiñ ruh ïa kane.
“Hadien ba la ïoh ei ka jaka kaba 10 hajar sqft na iwei I longkmie kaba ha Mairang na ka liang ka EC kan sa shim khia ïa kane wat ka jingkwah jong ki trai ka jaka ban ai kam ïa iwei na ki dkhot ka Longïing jong ki, yn sa ïakren ha ka EC ban peit ïa katei ka jingkyrpad bad kumjuh ban tei ïa ka building bathymmai ka Council,” ong u CEM hapoh ka Dorbar Lyuir ka KHADC kaba la long ha ka sngi Balang.
