Bang bha u Sohphlang ha ka thaiñ Nongshillong, pynlong tamasa ka KVK West Khasi Hills

Nongstoiñ, Nohprah 05: Ka Krishi Vigyan Kendra West Khasi Hills kawei na ki tnad treikam jong ka sorkar kaba la ïadon bynta lang bad kiwei pat ki tnad trei kam kum ka ICAR Umiam, Agriculture, Horticulture bad kiwei kiwei kaba peit na ka bynta ka jingbit jingbiang jong ki paitbah nongrep, ka la sdang ïa ka jingrakhe ïa ka taïew ba kyrpang jong ka jingdap sanphew snem jong ka KVK hapoh ka ri baroh kawei ba la tip kum ka Krishi Samridhi Swarna Week (KSSW).
Ïa ka jingrakhe ïa katei ka taïew ba kyrpang la sdang bad pynlong ha ka sngi balang, ha ka ophis jong ka Krishi Vigyan Kendra kaba don harud ka surok bah National Highway 44 (E) Shillong Tura ha Nongshilong Eastern West Khasi Hills.
Ha ka jingrakhe ïa katei ka taïew ba kyrpang la pynlong ruh ïa ka tamasa Sohphlang ba la wanrah da ki nongrep na kylleng ki shnong jong ka Mawthadraishan. Ki mar rep ba la wanrah ha ka sngi sdang, ki long u Sohphlang ba dang shu khlong, nangta kiba la dep sait bad kiba dang im ruh.
Nalorkata, la wanrah ruh ïa ki jhur ba bun jait kum ki muli, kubi, phan karo, krai, ki jingbam ba la shna da ki nongshet jingbam, ba la ai jingkyrshan da ka ophis KVK ban leit shah pyntbit, ki umsoh ba la shna hi da ki nongrep kiba la dep pyntbit bad kiwei kiwei.
Ha katei ka sngi la sdang ïa ka jingrakhe da kaba pynlong ïa ka jingïalang ba lyngkot, ha kaba la pynïaid da ka kong Y.Sohtun kaba dei peit ïa ka tnad Horticulture bad la ïoh ïa ka jingpynshai na ka kong V.J Lyngdoh Senior Saïantis jong ka KVK West Khasi Hills halor ka jingthmu jong katei ka prokram.
Katba u kongsan ka jingrakhe ïa katei ka taïew ba kyrpang, dei u bah Shakliar Warjri MLA ka 31 Mawthadraishan Constituency u ba dei ruh Myntri ka tnad Labour, Employment & Skill Development Sport & Youth Affair. Kiwei pat ki kynthup u bah W.Massar Block Development Officer Mawthadraishan Block kum u symbud kongsan, u Harish Thappar na ka Ministry of Agriculture jong ka sorkar pdeng.
U bah Shakliar Warjri haba ai jingkren kum u kongsan, u la ong ba ka kam rep ka dei ka kam kaba don burom haduh katta katta bad ki nongrep hi ki dei ki païa ba skhem tam ha ka ri bad ka ka pyrthei baroh kawei. Namar, lada ym don ki nongrep, ka jingdon ka spah ka phew katno katno ruh kam don jigmut namar ym ïoh bam.
U la ong ruh ba ki don bun bah ki briew ha ka jylla kiba sngew rem ban khot ki nongrep, namar ba kim sngewthuh ïa ka jingkordor jong ka kam rep.
U la ong ba ka jingapkhmih lynti tang ïa ki kam sorkar kan ym don jingmut. Kumta ki samla kiba la pyndep ïa ki jingpule bapher bapher, ki dei ban pynleit jingmut bad pyntbit bha ha ka kam rep kam riang na ka bynta ban kyntiew ïa ka ïoh ka kot jong ki.
Nalor kata u la ong ba kum u nongmihkhmat u la pynsngew sha ka sorkar na ka por sha ka por, ba kan mang pisa kyrpang na ka bynta ban shna ïa ka ïew ki nongrep ha kaba baroh ki nongrep kin ym leit die shuh ïa ki mar rep jong ki sha kiwei pat ki jaka.
Ha kaba ïadei ban ka dor ka mur jong ki mar rep ruh, u la ong ba u la dep pynsngew sha ka sorkar ba ka dei ban peit bha ba ki nongrep kim dei ban shah khñiot ïa ka dor ha ki nongthied, hynrei ba ka dor ka long kaba biang na ka bynta ki nongrep.
Khatduh eh u kongsan u la pyllait paitbah ïa ki mashin sha ki nongrep na ka bynta ba kin pyndonkam ha kiba bun ki bynta.