Shillong Jymmang, 30: Ka Ophis jong u Development Commissioner, ka Sorkar Meghaaya ka la kyntu ïa baroh ki nongshong shnong jong ka jylla ki bym pat pynrung kyrteng Aadhaar ba ki dei ban pynrung kyrteng noh ïalade kham kloi khnang ba kin ym duh ïa ki jingmyntoi bapher bapher ba la ai da ka Sorkar India.
Kane ka jingkyrpad ka la long hadien ba ka UIDAI ka la pynmih ïa ka jingpynbna ba ka la pynjlan sa lai bnai ban pynrung kyrteng Aadhar ha ki jylla bad ki bym leit pynrung kyrteng kin ym ïoh pdiang shuh ïa kino kino ki jingïarap ne jingmyntoi na ka Sorkar India.
Lah ban kdew ba ka duna bha ka jingpynrung kyrteng Aadhar hapoh ka jylla Meghalaya bad ki nongshong shnong ki bym don Aadhar, shen ki lah ban duh noh ïa ka lad ban ïoh ïa ki skhim bapher bapher na ka Sorkar India bad ki ban duhnong bha na kane kin dei ki kynthei bad ki khynnah ki ban ym ïoh ïa ka Supplementary Nutrition Programme (SNP) lyngba ka ICDS jongka Social Welfare Department.
Na ka jingbym don ïa u Aadhar Number, kin ïoh tang 10 % ïa ka SNP na ka bynta ki khunlung bad ki khynnah kiba don hapoh 6 snem ka rta bad ki kmie kiba pun khun bad kumjuh ruh kiba dang ai buiñ ïa ki khun naduh ka Quarter ka ban wan.
Ka skhim kum ka Ayushman Bharat kaba la pyntreikam ha ka jylla kum ka Megha Health Insurance Scheme (MHIS) ka long kaba donkam ban don ïa u Aadhar.
Watla ïa ka jylla Meghalaya ym shym la pynlong ban shim ïa u Aadhaar hynrei yn ym lah ban pdiang ïa ki jingmyntoi na ka Sorkar India khlem da don ïa u Aadhaar Numbar.
Ka kyndon ha ka Section-7 jong ka Aadhaar Act ban ai jingïarap ïa ki briew ban pynïoh ïa u Aadhaar Number khnang ba kin lah ban ïoh ïa ki jingïarap, ki jingmyntoi bad ka jingshakri.
Kumta ban pynshlur ïa ki jylla ba kan don ka jingshim ïa u Aadhar Number da baroh ki nongshong shnong ka jylla ban ïoh ïa ki jingmyntoi na ki skhim ka Sorkar India, lyngba ka “50 days Aadhar saturation programme” la sdang ban pyntreikam ha ka jylla ba la leh ïa kane na ka bynta ki khunlung kiba dang shu kha, ki khynnah rit, ki longkmie bad kiwei kiwei ki bym pat don ïa u Aadhar Number khamtam haba ka jingpynrung kyrteng Aadhar ka long tang kumba 10-12 %.
Ban pynsted ïa ka jingpynrung kyrteng Aadhar ha ka jylla bad ha kylleng ki district ki la pynkhreh ïa ka Action Plan ha kaba yn don ruh ïa ki Enrolment Camps bad ki Deputy Commissioners kin sa pyndonkam ïa baroh ki lad ki lynti ban pyndonkam ïa ki ophisar bad ïa ka bhah tyngka na kiba don bynta baroh kum ka tnad Community & Rural Development, Food & Civil Supplies, Education, Health bad Meghalaya State Rural Development Society (MSRLS).
Ka Nodal Department jong ka Aadhar ha ka Sorkar Jylla ka dei ka tnad General Administration Department ha kaba la sdang ïa ka jingïalam lynti lyngba ka ‘Support Team’ bad kala dep ruh ban bhah ïa ka song tyngka halor ka “50 days Aadhar saturation campaign”.
Ki Deputy Commissioners kin ïatrei ryngkat lang bad baroh ki Child Development Project Officers (CDPO), Anganwadi Workers and Helpers, Village Employment Councils (VECs) bad ki Self Help Groups (SHG) ha ka jylla bad kin thaw ruh ïa la ki buit treikam bad ban kynthup lang ïa ki kynhun trei mon sngewbha, ki sengbhalang bad ki lad pathai khubor ban ïoh ïa ka jingkyrshan bad ban pynkhlain ïa ka jingpynrung kyrteng.
