Ban weng ïa ki jingeh ki nongrep bad wan rah ka shongsuk shongshngaiñ, kynduh DC ka KSU
![](https://mawphor.com/wp-content/uploads/2023/09/WhatsApp-Image-2023-09-26-at-1.12.36-PM-Copy.jpeg)
Mawkyrwat, ‘Nailur 26: Ka Khasi Students’ Union (KSU) jong ka South West Khasi Hills District bad ka KSU Ranikor Circle mynta ka sngi ki la leit ban ïa kynduh ïa u Deputy Commissioner jong ka South West Khasi Hills District ban pynsngew halor ki jingeh kiba ki paidbah ka thaiñ khappud ki ïa kynduh na ka jingwan pynjulor ki Hati Khlaw ïa ki mar rep.
Ha kane ka sngi, ka KSU ka la leit ban pynsngew ha khmat u Deputy Commissioner jong ka South West Khasi Hills District halor ki ar tylli ki mat ba kongsan kata ka jingpynjot ki Hati Khlaw ïa ki jaka rep bad halor ka jingshongsuk shongshngaiñ ha Mawkyrwat.
Ha ka shithi ba ki la phah ha u Deputy Commissioner jong ka South West Khasi Hills District ki la pynpaw jingsngewkhia halor ki jingeh kiba ki paidbah ka thaiñ khappud ki ïa kynduh na ka jingwan pynjulor ki Hati Khlaw ïa ki mar rep bad ki la ïathuh ba ki jingshah pynjulor jong ki mar rep ka dei hapoh shnong Pyndenlaru bad ha kawei ka jaka rep ïa kaba la tip kum ka Ba-I-Jngai. “Ki jaka rep, ki mar rep bad ki ïing ba ki nongrep ki pyndonkam ban sah katkum ka jinglum jingtip ka kot haduh ki 17 ngut ki trai bri”.
Namrkata, ka Seng ka kyntu ruh ïa ka ophis Deputy Commissioner jong ka South West Khasi Hills District ban ïarap tuklar lem halor kane ka jingwan pynjulor jong ki Hati Khlaw ïa ki mar rep kiba la ju long na ka por sha ka por namar khlem artatien kane ka lah ban buh jingma ruh ïa ki nongrep bad ki nongshong shnong ne wat ïa ka jingim briew ruh hadien habud lada ki bor sorkar kim lah ban thaw ki lad ki lynti ban ïada lypa na ki Hati Khlaw kiba ju wan kiew ban pynjulor sha kane ka thaiñ. Ym tang kata, ka kyntu namarkata, ïa ka ophis ba ka dei ban thawlad mardor ban buh ne beh ïa ki Hati sha ki jaka ba kham shngaiñ khnang ban ïada na ki jingshah pynjulor ne na ki jingjia ba sngewsih hadien habud.
Ha kawei pat ka liang, ka KSU Mawkyrwat Circle ka la kyntu jur ïa ki paidbah jong ka thaiñ Mawkyrwat ba kin long kiba husiar ha ka ïaid ka ïeng namar kumba long ha kine ki sngi ka ïaid ka ïeng jong u paidbah kam long shuh kaba shngaiñ namar la ki kam sniew ki la nangjyllei. Ka seng ka kyntu ruh ïa ki bor pulit ba kin kham pynjur shuh shuh ïa ki bor pahara bad ban ïa trei lang ruh bad ki Seng Samla Shnong khnang ban lah ban tehlakam ïa kine ki sniew kiba ju jia man ka por ym ban pahara tang ha ki por mynmiet hynrei ha ki por mynsngi ruh.