Ban shu pyrta ktien ieit jaidbynriew ha kine ki sngi ka la poh dor palat ki kam pat ym paw : Prestone Tynsong

Nongstoiñ, Risaw 27: “Na ka liang jong nga kum u President jong ka State NPP, ngi pdiang sngewbha ïa phi sha kane ka ïing jong ngi. Ngi la long mynta kum shi ïing shi sem ha ka jingïalam jong u Conrad Sangma, ha kaba ha ka jingïalam jong nga hapoh ka party jong ka Jylla. Nga kyrpad ïa baroh ki nongïalam jong ka District bad ki block baroh lai tylli, ba sngewbha ba hadien kane ka jingïalang, baroh ha la ki jong ki jong ki block bad constituency ban ïakhot ïa wer bad ïatreilang bad pyntyllun ïa ka kam shuwa ka elekshon 2028”, ong u Bah Prestone Tynsong State President ka NPP u ba long ruh ha ka juh ka por u Deputy Chief Minister jong ka sorkar Jylla, haba kren pdiang sngewbha ïa ki nongïalam jong ka Congress na West Khasi Hills kiba la pynïasoh mynta ka sngi 27 tarik u Risaw 2025 sha ka party NPP.
“Nga kwah ruh ban ong ba ki nongïalam jong ka West Khasi Hills ba to ngin nang ïai trei shitom shuh shuh, ban pynkhreh ïa ka elekshon MLA 2028. Ki la bun ki jingkren kiba lai phew jait lai phew skit, ki jingkynnoh kiba lai phew jait pyrshah ïa ka sorkar bad ka seng NPP. Hynrei, ngim dei ban duh mynsiem namar ha ki social media lei lei ngi la dep ïohi ïa ka jingïakynnoh ka jingïakren bym ithuh ithaw shuh. Kaba nga kwah ban ong ïa baroh ka long to long kiba stad bad husiar, wat peit than ne sngap than ïa ki social media namar 90% ka dei ka khubor thok bad lamler suda bad tang 10% ba ka ïathuh ïa ka jingshisha”.
“Ka party NPP ka ieng ban shakri ïa ka jylla baroh kawei, kyrpang ïa ka West Khasi Hills baroh kawei. Lyngba kane ka sorkar ngi la dep ïohi ïa ki jingtreikam jong ka ha ki tnad bapher bapher bad phin sa nang ïohi nangne shakhmat ïa ki kam kiba ngin nang pyntyllun ha baroh ki Constituency ha West Khasi Hills. Ka surok na Nongstoiñ sha Maweit ka dei kawei na ki matti ba khraw. Hynrei ngan ïathuh ha phi ba mynta pat sa na Maweit sha Nongjri ngin bteng ïa ka surok. Ka daw ngi kwah ban leh kumta ka dei namar ngi ïohi ba kane ka jaka ka dei ka lad khaïi kaba biang eh, ka ban pynïasoh ïa ka Ranikor bad Bangladesh bad ka ban pynïasoh ruh shaduh South Garo Hills”.
“Ban ïakren ïa ki jingshisha hi, ym pat don sorkar naduh u snem 2018 kum kane ka sorkar kaba lah ban pynlut por bad pynlut ha ki kam lynti syngkien. Nga la don ha ka sorkar naduh 2003, hynrei dei tad ha u 2018 bad haduh kane ka khyllipmat ba ka jingpynlut pisa ha kaba ïa dei bad ka surok, ym duna shuh ïa ka 5000 klur tyngka”.
“Ha ka por long CM u Dr Mukul kaba bun eh kaba ngi ai jingkheiñ ka long 400 klur, kata kaba ngi pynlut ha ka Jylla baroh kawei. Mynta pat kaba khyndiat eh ka long 5000 klur bad nga ngeit ba kane hi kaba pynlong ïa kiwei pat ban wan pynïasoh noh sha ka party NPP namar ki jawdud. Balei pynïasoh ka daw ka long namar ba ngi donkam ïa ka roi ka par”.
“Ngam don por ban jer lut ïa ki sector kaba ngi la leh bad ngi dang leh, hynrei nga ngeit skhem ba ki paidbah kin sa ïohi ïa kiba bun kiei kiei. Lehnohei ba ngin shu ïa pyrta ha surok tang da ka shyntur suda ym don jingmut. Lehnohei ruh ban ong ieit jaidbynriew, lada ngim lah ban leh ei ei ïa ka. Ban kren ktien jingieit ka la poh dor ha ki por ba mynta. Ba suk bha ban ong ba ieit, hynrei nga ong ïa phi ai ba ka kam jong ka party NPP kan kren kham jam ban ïa kita kiba shu pynpaw bad hylla surok ban pynbiej paitbah”, ong u Bah Prestone Tynsong.
Ka jingpdiang burom ïa ki nongïalam jong ka Congress jong ka West Khasi Hills, la pynlong ha phyllaw jong ka I.B PWD, ha kaba la donlang da u Bah Gigur Myrthong kum u shongknor ka jingïalang, u Bah Gabriel Wahlang MLA Nongstoiñ, Bah R.G Momin MLA Rambrai, MDC Rambrai Bah Lurshai Kharbani, ki ex MDC ba kynthup ïa u bah N.Nongdkhar bad bah Nondi Diengngan.
Nalor kata la donlang ruh ki kynrem ki lyndan jong ka party kum u Bah H.M Shangpliang bad kiwei, kynthup ruh ïa u Bah Bormanding Nonglang President jong ka Congress na West Khasi Hills ryngkat ki nongïalam jong ka party kiba la pynïasoh noh ïalade sha ka party NPP ha ka sngi nyngkong 27 tarikk u Risaw 2025.
Na ka liang ki nongmihkhmat ki la pynpaw ruh ïa ki kyntien pdiang sngewbha bad pyndeng muffler ïa ki nongkitkam ka Congress kiba la wan pynïasoh, kiba don kumba 20 ngut ei ei.
Ha kajuh ka por la ïoh jingkren na u Bah Bor u ba la pynpaw ba ki long kiba la pynkhreh ïalade ban ïatreilang bad ka NPP bad ban pynïoh ïa ka jingjop don burom ha u 2028 ha baroh ki Constituency ha West Khasi Hills.