Shillong, K’Lyngkot 07 : Ka Voice of the People Party (VPP) ka la pynpaw biang ba ka dei ka thong bad ka jingangnud jong ka ban ïakhun tyngeh na ka bynta ban ïoh pynrung noh ïa ka Ktien Khasi ha ka Khyrnit kaba Phra jong ka Riti Synshar jong ka Ri.
“Ho-oid, ba ka Ktien Khasi kan ïoh rung ha ka Khyrnit ba Phra jong ka Riti Synshar jong ka Ri, na ka liang ka VPP kan ïakhun borbah,” ong u Nongai Ktien ka VPP, Dr. Batskhem Myrboh.
U la banjur ruh ba ka Ktien Khasi ka la ïa ryngkat kyrdan bad kiwei pat ki jait Ktien kiba don ha ka thain kiba la dep rung ha ka Khyrnit kaba Phra. Kumta, halor kane u la buh jingkylli ruh ïa ka sorkar pdeng halor ka nongrim jong ka kaba ïadei bad kane ka bynta.
“Lada phi nujor ïa ka Ktien Khasi bad kiwei pat ki jait Ktien na ka thain kiba la dep rung ha ka Khyrnit kaba Phra, ka Ktien Khasi kam duna shuh hynrei ngim tip pat na kiei ki daw bad kaei ka jingthmu jong ka sorkar pdeng,” ong u Dr. Myrboh.
Shuh shuh u ong ruh ba ka Ktien Mizo jong ka Mizoram kaba la pyndonkam kum ka official language, kam pat shah kynthup ha ka Khyrnit ba Phra da kaba ong ba kane ka pynpaw ïa ka rukom treikam jong ka sorkar.
Ha kajuh ka por pat u Dr. Myrboh u la kyntait ban ong ei ei halor ka sienjam ba la shim da ka sorkar jylla halor kane ka bynta. “Ha kaba ïadei bad ka jingpyrshang jong ka sorkar jylla, ngam lah ban ong namar kane ka dei ka jingdawa kaba la slem bha naduh ka por jong ka sorkar Congress ha ki por ba la dep bad wat na kane ka sorkar ruh”.
