Shillong, Nailar 28 : Ka District Tuberculosis Centre jong ka East Khasi Hills District ka la sdang ban leit ïalap kylleng ki skul na ka bynta ban pynsngewthuh paidbah ba dei tang ka jingïatreilang kaba lah ban ïarap ïa ka jylla ban ïoh rat dyngkhong ïa ka jingpang Tuberculosis.
Lyngba ka National Tuberculosis Elimination Programme hapoh ka National Health Mission, Meghalaya, ka DTC ha ka sngi Thohdieng ka la pynlong ïa ka jingai jinghikai halor katei ka jingpang ha H. Elias Memorial Higher Secondary School, Shillong ha kaba naduh ki samla pule haduh ki nonghikai ki la ïoh ïa ka jinghikai kumno ban ithuh naduh dang sdang ïa ki dak ki shin jong katei ka jingpang bad ruh kumno ban ïada bad sumar ïa ka.
Katkum ka kyrwoh na ka DTC, la ïathuh ruh nalor ka jingkren na u Principal jong katei ka skul, Brother Anant la ïoh ruh ïa ka skit na ki samla pule BSW jong ka St. Edmund’s College bad Women’s College kiba la pyni da kaba shu ak kumno katei ka jingpang ka saphriang bad kumno lah ban ithuh bad sumar pynkoit. Ka thong jong ka DTC ka long ba pynsngewthuh kham bniah ïa ki khynnah skul ba kin tip kumno ba kin lah ban ïada ïalade ba kin long ruh ki nongïalap kumno ban sumar bad ruh wat ban pynduh ïa ka jingshah peit ibein jong kito kiba ïoh ïa katei ka jingpang.
Kiwei pat kiba kren ha kane ka sngi ki kynthup naduh u Bah Gilbert Kurbah District Programme Coordinator, Dr. E. Kharmuti District MCH Officer, Bah Oniwell Mylliemngap bad ruh na ka Kong Tracy Kharkamni, State Coordinator.
La donlang ruh ha kane ka sngi naduh ki nongtrei jong ka District Tuberculosis Center, East Khasi Hills District bad ruh na ka Nongthymmai Urban Primary Health Center.
