Ban pynsuk ïa ki paidbah, ai jinghikai ka SBI ïa ki skhim bapher bapher jong ka sorkar pdeng

Shillong, Risaw 24: Ka State Bank jong ka Ri India, ha ka jingïatreilang bad ka Sorkar Meghalaya, ka Reserve Bank of India ka NABARD bad kiwei pat ki tnat treikam ha ka liang ka pisa, ka la pynlong ïa ka jinghikai kumno ban kunai pisa bad ban pynïar ïa ka jingtreikam haba ïadei bad ki skhim ka sorkar ban ïarap ïa ki paidbah.
Ïa kane ka jingïalang ka leh da ka jingthmu ban pynsngewthuh paidbah shaphang ki jingshakri jong ka Bank bad ki skhim jingïarap bapher bapher jong ka Sorkar, khamtam eh sha ki paidbah kiba dang duna ka ka ioh bad la pynshai ruh halor ki skhim kongsan jong ka Sorkar.
Kine ki skhim kiba kynthup ïa ka Pradhan Mantri Jan Dhan Yojana (PMJDY), Pradhan Mantri Suraksha Bima Yojana (PMSBY) bad Atal Pension Yojana (APY). Kiba kine ki skhim ki thmu ban pynsuk ïa ki paidbah ban plie bad pyndonkam ïa ki account Banking, ban ïoh jingpynshngaiñ lyngba ka insurance bad ban pynbeit lypa ïa ka jingïoh pension ha ka lawei jong ki paidbah.
Ha kane ka jingïalang la wanshim bynta da u Bah Rocky Kylla u ba dei u shongknor ka Umsning Town Dorbar; u Olden Nongpluh u ba dei ruh u General Manager bad Officer-in-Charge ka RBI Shillong u Abraham Selvin u ba dei General Manager ka Network baar jong ka SBI.
Kiwei ki long u Rvantlius Kharbyngar u Director of Institutional Finance bad Ex-officio Joint Secretary jong ka tnat Finance Sorkar Meghalaya u Bah Madras Dkhar Assistant General Manager jong ka NABARD ki Rangbah Shnong lem bad ki riew paidbah.