Jowai, Rymphang, 13: Ka Kur War Mynso ha kane ka 13 tarik u Rymphang, 2024 kala ïoh ban plie paidbah ïaka Ïing Dorbar Kur kaba don haka shnong Mynso-A, West Jaiñtia Hills, Elaka Mynso haka jinglut kaba 45 Lak tam ïa kaba la sdang ban tei naduh u snem 2017.
Ha ka jingïalang plie pyrda ïa katei ka ïing Dorbar la pynïaid da u ma Lionel T. War, Chairman Inauguration Committee da ka jingwan sakhi lang u Rev. Dr. Fr. Ioannis War kum u kongsan, u Rev. B.B. Lamin kum u symbud kongsan, u Pa Dolloi ka Elaka Mynso, ki Waheh Shnong, ki Secretary Shnong ka Mynso-A, Mynso-B ha ryngkat ka jingdonlang ki khun ka kur kiba najan bad na jngai.
U Chinta War, Secretary Kur War Mynso ula ai ki kyntien pdiang burom ïa baroh, la ïoh ka jingkren da u Jimmy War, Chairman Kur War Mynso uba la ïathuh khana lyngkot shaphang ‘Ka Oor War’ kaba long ka Seiñjait ka Kur War Mynso bad ula batai kumjuh shaphang ka jingïaid lynti ka Seiñ Kur haduh ban tei ïa katei ka Ïing Dorbar Kur.
U Rev. B.B. Lamin ula ai ka jingkitbok kitrwiang ïa ka Kur War baroh kawei bad u kyrmen skhem ka jingdon jong kane ka Ïing Dorbar Kur kan long ka jingkyrkhu kaba khraw ïa ka kur ba kan lah ban saiñdur ïa ka bha ka miat ha ka imlang ka sahlang jong ki khun ka kur ha baroh ki liang.
U Rev. Dr. Fr. Ioannis War haka jingkren kum u kongsan ula pynpaw ka jingsngewkmen ban ïoh kum kane ka lad ban pynlong ka jingïakynduh lang kum ki para kur kiba mih na ka juh ka Seiñjait “Ka Oor War”.
Shuh shuh u Rev. Dr. Fr. Ioannis War ula kren ha kaba ïadei bad ka bynta ba kyrpang jong ka “Ka Oor War” bad “U Mookheng-Kheng”, kiba long ki dak jong ka jingïaieit, jingïatylli bad ka jingïaburom kylliang.
Ha kaba ïadei bad ka kot shaphang ka jingïathuh khana ka Oor War, ula ong ka por kala dei ban pynbha pynmiat bad ban pynjanai ïa kane ka kot, khnang ba ki khun, ki ksiew kin lait na ka jingshah ïalam bakla shaphang ka ‘Seiñjait Seinkynja’ jong ka Kur War Mynso.
Ha kaba khadduh ula kyntu ïa ki para kur ban im ha ka nongrim jong ka jingïakyrshan lang ha kino kino ki bynta kumba long ha kipor jong ki longshwa bad ban long ki briew kiba don ka jingïaieit bad ka jingshañiah na kiwei.
Kum ka dak ban pynsahnam ïa kane ka sngi la ïoh ruh ban pynkup burom ïa arngut ki longkmie ka Kur kiba la kynjoh sha ka rat kaba 80 snem, ha kane ka juh ka sngi la pynkup burom kumjuh ïa ki samla pule ka Kur kiba la wan rah burom ïa ka Kur ha ki Examination bapher bapher.
La pynphuh pynphieng ïa kane ka sngi da ki jingrwai, ki jingshad na ki khun ka Kur War kiba kynthup na Mynso, Jwai, Kyndong bad na Namdong.
