Ban pynrung ha ka map jngohkai pyrthei, donkam ban wad bñiah shwa ïa ka jingwan ki sim Amur falcon ha Tyrso – Bah A.L Hek.

Nongpoh, Naiwieng 15: U Myntri sorkar ka jylla ba dei peit ïa ka tnad Veterinary & Animal Husbandry, u Bah A.L Hek u la pynpaw da kaba ong, “ Ngi donkam ban wad bniah shuwa ïa ka jingwan poi ki sim amur falcon ha Ri Bhoi, kaba dei ha ka Shnog Tyrso, shuwa ba ngin pynrung ïa ka kane ka jingwan ki sim amur falcon ha ka map jngohkai pyrthei”.
U Bah A.L Hek kum u myntri sorkar ka jylla, u la kren ïa kitei ki kyntien ban pynpaw sha ki paidbah ka jyla ka dei ha ka jingïalang kaba u la leit ban plie ïa ka tamasa Amur Facon ha ka sngi baar jong ka taiew ha ka shnong Tyrso, ha kaba ïa kane ka tamasa la pynlong da ka Tyrso Valley Wildlife Protection Society ha ka shnong Tyrso ha Ri Bhoi District.
U la ong ruh ba kum u myntri sorkar ka jylla ba dei peit ïa ka tnat Veterinary & Animal Husbandry, u sngewkmen ba ka Tyrso Valley Wildlife Protection Society ka la shim ïa kane ka bynta ban pynlong ïa ka tamasa ban pynpaw pyrthei halor ka jingwan kitei ki sim kbeit (Amur falcon) ha katei ka shnong Tyrso, hynrei ngi dei pat ban ioh ïa ka jingtip kaba bniah naei kine ki sam ki wan poi bad kumno ka jingïaid lynti jongki, haduh ba ki la leit phai biang sha katei ka ri kaba ki wan ban sah shipor ha katei ka thaiñ Tyrso.
“Ngi da donkam ban da wad bniah bin-pa-bin halor kane ka jingwan poi kitei ki sim man la u snem ha ka thain Tyrso, ha kaba ka jingwan jongki ruh ki la kot da ki lak tylli bad kane ka lah ban long ka jingkyrkhu ïa ka thaiñ Tyrso bad ïa ka jylla hi baroh kawei ba ngin lah ban khring ïa ki nongjngohkai pyrthei” u la ong, bad bynrap pat da kaba ong, “Shwa ban khring ïa ki nongjngohkai pyrthei na kylleng ki ri ka pyrthei kiba ieit kyrpang ïa ki sim ki doh, ki mrad ki mreng, ngi da donkam pat ban tih bniah khang ba ngin tip ïa ka jingshisha na ka bynta ban ioh pynrung pat ha ka map jngohkai pyrthei ka jylla” u la bynrap.
Shuh shuh, u la bynrap ruh da kaba ong, lada ngi lah shisha hi ban leh ha kata ka rukom kaba biang bad kaba pura halor kane ka jingwan poi kitei ki sim kbeit sha ka jylla kan long ka jingkyrkhu ïa ki paidbah ban kyntiew ïa ka ioh ka kot, namar bun ki riew ieit mariang bad ieit mrad kin poi bad kata ruh ngi donkam ban pynbit pynbiang haduh ba la ithuh ïa katei ka jaka kum ka jaka jngohkai pyrthei bad ruh ba kane ka jaka kan rung noh ha ka map jngohkai pyrthei, u la bynrap shuh shuh.