Ban pynkloi ki jingïarap ïa ka Skul Sorkar ha Mawpud, phah jingthoh ka KSU sha u DC

Mawkyrwat, Jylliew 20: Ka Khasi Students Union jong ka South West Khasi Hills District lyngba ka Education Cell da ka mynsiem jong ka jingsngewkhia bad
sngewkitkhlieh halor ki jingeh kiba lah ban ktah ïa ka pule puthi, ka la leit ban ai jingpyntip bad kyrpad iaphi halor ka jingjia ha ka miet bad ka step 13 – 14 tarik mynta u bnai Jylliew, 2023 ha kaba kawei ka ïingskul sorkar ïa kaba la tip
kum ka Khlur Rit Government Lower Primary School kaba don ha shnong Mawpud ka la mad ïa ka jingshah pynjot na ka daw ka jingtwa khyndew kaba la mih na ka daw ka jingther jong u slap.
Haba ïadei bad kane ka jingjia, la sakhi ïa kane ka khubor ha ki rynsan Social Media bad kumjuh ruh lyngba ki tnad pathai khubor, ong ka kyrwoh khubor. Shuh shuh la ong ruh ba kane ka skul hadien kane ka jingjia bad kumba ka long mynta ka la hap ban mad ïa ki jingeh kaba la long ka jingduh kaba khraw khamtam ïa ki khynnah skul namar kam long shuh ban pynlong skul. “Ym tang katta, ka seng ka la ïoh jingtip ruh ba namar ka eksamin ka la jan, na ka liang ki nongpynïaid skul bad ki Nonghikai kim banse ban pan kamra na ki ïing briew bad na ka ïing Anganwadi Centre ban ïoh pynlong skul ïa ki khynnah”, ïathuh u samla Episcopal.
Namarkata, ka Education Cell jong ka KSU South West Khasi Hills District lyngba ka jingthoh bad hadien ba ka la ïoh ïa ka jingud jingnam jong ki nongshong shnong, ka la sngewdei ban kyrpad ïa ophis u Deputy Commissioner bad u Chairman jong ka District Disasters Management Authority jong ka South West Khasi Hills District ba un thaw ki lad jinïarap kloi katba lah na ka bynta ka skul lyngba ka Disasters Relief Fund lane kino kino ki mang tyngka (Schemes) ïa kane ka skul khnang ba ki khynnah kim nym duh ban leit skul bad ban thoh ïa ka eksamin jong ki bad khnang ban weng ïa kane kawei ka jingeh ha ka pule puthi hapoh katei ka shnong.