Mawkyrwat, Lber 20 : Ka Meghalaya State Disaster Management Authority (MSDMA), ka District Disaster Management Authority (DDMA) jong ka South West Khasi Hills District, ka Ranikor Civil Sub Division/Ranikor bad Mawkyrwat C&RD Block, ka Revenue & Disaster Management Department jong ka Sorkar Meghalaya ha ryngkat ka jingïatreilang bad ka National Disaster Management Authority (NDMA), Ministry jong ka Home Affair ka Sorkar India ha ka sngi Palei ki la pynlong ïa ka State-Level Mock Exercise 2025 halor ka jingkhynñiuh jumai uba ka jingthew ka dei ki la buh ka dei haduh 8.3 Magnitude ha South West Khasi Hills District.
Lah ban kdew ba ha kane ka Mock Exercise ba la pynlong hapoh ka South West Khasi Hills District la ïashimbynta shitrhem da baroh ki tnad treikam kiba hapoh ka South West Khasi Hills District, ha ryngkat ka jingïatreilang ka Mawkyrwat Civil Hospital bad ka CHC Ranikor, ki ban dei ki bynta ban peit bniah ïa ka jingtreikam jong ki bad ka jingpynkhreh ha ka por ba jia ki jingjia ba sngewsih lyngba ki lad jingsumar. Ym tang kata, kane ka Mock Exercise ka don ruh ha ka ïa ka jingthmu ban pynkhlaiñ ïa ka jinglong ba la pynkhreh jong ki kynhun ban ïarap ha ka por ba donkam kyrkieh bad ban pynthikna ïa ki buit ne ki lad ki pynïaid ban tehlakam ïa ki jingjia ba sngewsih ki ban sa pyntreikam ha ka rukom kaba dei lada wan jia ki jingshah lynshop ha ki bor jong ka mariang kum u jumai.
Ha kane ka Mock Exercise ki la bynta ba kan don ka jinghap khyndew ha Laitlawsang, ka jingpluh ding ha ki bynta ba shadien jong ka ophis ka tnad ka koit ka khiah ha Mini Secretariat, ka jingtwa jong ki jingtei ha Mawkyrwat Market, ha ophis KHADC Mawkyrwat Branch, ha ka jingtei jong ka ïing barim ha Civil Hospital, ka jingpait ka ïing skul ha Mawkyrwat Presbyterian Secondary School, Laitlawsang, ka jingsahkut ki briew na ka jingpra ka jingtei hapoh ka ophis jong u Water Resource bad ka jingtwa khyndew ha ka shnong Kensohsan kaba hapoh Ranikor Sub division. Ha kane ka jingjia lyngba ka Mock Exercise ki la don ruh kiba mynsaw kata kiba mynsaw malu mala ki don 130 ngut, kiba jur ki don 100 ngut, kiba la shitom kham jur ki don haduh 150 ngut bad kiba ïap ki don kumab 10 ngut ei ei bad kine kiba la shah ktah ki napoh Mawkyrwat bad Ranikor C&RD Block.
Kane ka Mock Exercise ka long ruh kawei na ki lad ba ki sienjam ba kongsan ha ka ban pynkhlaiñ ïa ki lad jingpynkhreh bad lad jingïada na ka bynta ki jingjia ba sngewsih bad ban pynthikna ba ki shnong ki thaw ki long kiba la pynkhreh bha ban pynïaid lada wan jia ki jingjia ba kyrkieh kum ka jingkhynñiuh jumai. Ki bor synshar distrik ki pynshlur ruh ïa baroh ym tang ki ophisar sorkar hynrei wat ïa ki paidbah nongshong shnong ba kin shim ka kabu ïa kum kine ki lad jinghikai kiba kordor khnang ba kan long ka jingmyntoi halor kumno ban pynkhreh lada wan jia ki jingshah lynshop ha ki bor jong ka mariang.
Ha kane ka Mock Exercise la ïohi ba ka jingshimbynta ka dei naduh u Deputy Commissioner bad kum u Chairman jong ka District Disaster Management Authority, South West Khasi Hills District, u Superintendent of Police, South West Khasi Hills District lem bad kiwei de ki ophisar sorkar kiba hapoh jong ka South West Khasi Hills District kiba kynthup ïa ka Mawkyrwat bad Ranikor C&RD Block.
