Ban ong ba ka jingkiew ka jylla ka dei na ka ram ka long kaba bakla haduh katta katta: Conrad

Shillong, Lber 10 : Da kaba weng lut ïa ki jingsngewthuh bakla baroh, u Myntri Rangbah ka Jylla Conrad K Sangma ha ka sngi Nyngkong u la ong ba jingïaid lynti jong ka Meghalaya kadei kaba la kyrshan da ka jingmih hi na la ka jong ka jylla bad ruh na kaba shim ram.

Haba jubab hadien ka jingïatai halor ka Mangtyngka, u Myntri Rangbah u la ong ruh ba ka ram ba 50 snem lyngba ka  Special Assistance to States on Capital Investment (SASCI) bad ruh ki projek Externally-Aided Projects (EAPs) ki long thik kum ki jingkyrshan ba shu ïoh ei.

  U Myntri Rangbah ha ka jubab kaba bniah bha halor ka Mangtyngka, u la ong, “Kane ka jingsngewthuh bakla ba ka jingkiew jong ka jylla kadei tang na ka ram bad ba ki paidbah ka jylla ki hap ban siew ïa ka ram, kadei kaba bakla haduh katta katta.”

  Haba pynshai bniah, u Myntri Rangbah u la ong ruh ba ka bhah khajna ba ki ïoh na ka sorkar pdeng kadei katkum ki kyndon jong ka Riti Synshar bad ba la bthah ruh da ka riti synshar ïa ka sorkar pdeng ban ai ïa kine ki khajan sha ka jylla Meghalaya bad ruh sha kiwei ki jylla.

  “Kumta ban ong ba kine (khajna na ka sorkar pdeng) ka dei ka pisa jong ka sorkar pdeng ka long pyrshah ïa kaei kaba la kdew ha ka riti synshar ha kaba ka khajna la pynpoi sha ki jylla katkum ka jingkhein ba la pynbiang da ka Finance Commission bad kane kadei ka pisa jongngi hi. Kam dei satia ba ka sorkar pdeng ka leh bha da kaba ai ïa ka pisa ïangi, hynrei kadei ka hok jongngi ban ïoh bad kumta, katei kadei ka pisa kaba ka jylla hi ka don hi,” bynrap bïang u Myntri Rangbah.

Shuh shuh u la ong ruh ban pynshai sha ki paidbah haba ïadei bad ka jingïakren ba jur palat ka jingshim ram bad mano ban siew pat ïa ka, u Myntri Rangbah u la ong, “Na ka 29,438 klur tyngka, 3,800 klur tyngka kadei ka ram katba kiwei pat ki dei ka skim jong ka sorkar pdeng lane ka jingïoh ba ka jylla kadei ban ïoh kiba kynthup ïa ka bhah jong ki khajna na ka sorkar pdeng bad ruh ki khajna kiba mih hi na ka jylla.”

Kumta, u ong ba kane hi ka kdew shai ba ka jingkyrshan pisa na ka bynta ka roi ka par kam dei satia na ka ram. “Ha ka jingshisha kadei tang khyndiat eh, tang kumba 10 persen na ka jingdon baroh, kata ruh hapoh u pud. Kine baroh ki dei ki jingkhein kiba dei suda bad ngam shym  la thaw hi,” u la ong.

  Kumta, u ong ba ka long kaba donkam ïa baroh ban tip bad kynmaw ba hapoh ka 11 haduh 12 persen kadei na kaba shim ram kaba long hapoh u pud ba dang ailad katkum ki kyndon kiba la buh da ki agency bapher bapher kynthup ïa ka tnad Pla-tyngka jong ka sorkar pdeng bad ruh ka Reserve Bank of India (RBI).

Nangta u Myntri Rangbah haba kren ha ka ktien Khasi kaba ong ba ka “SASCI bad EAP (long) kum pisa ba ïoh ei” –u la ong ba kine ki jingkyrshan ba ki ïoh ki long shisha kum ka pisa ba shu ïoh ei.

“Ngam mut pat ban ong ba kadei kaba ïoh ei, hynrei ka wan ha kata hi ka dur namar kam dei satia kumta ka dor ram kaba ngi ïa kren,” u la ong.

Shuh shuh haba pyntip ba ka Meghalaya kan shim ïa ka ram khlem donkam siew sut kaba kot sha ka 2450 klur tyngka  hapoh ka SASCI, u Myntri Rangbah u la ong, “Kane kadei ka jingshim kaba heh tam ba ngin shim bad kane ka shong ruh ha ka jinglah jong kano kano ka jylla bad ruh halor ka jingpyndonkam ba phi leh ba ka sorkar India ruh kan mang shuh.”

  U Myntri Rangbah u la kular ruh ba ka sorkar jylla kan pyntikna ba ka Meghalaya kan ym lait satia ha kata ka ram ba la pynap shrip.

“Ngeit phi ki paidbah ka jylla bad ka Iing ruh ki dei ban tip ba ka ngi la shim ïa ki sienjam baroh kiban pyntikna ba ka Meghalaya kan ym ngat ha ki ram ba la pynap shrip. Ngin ym buh jingma ïa ka lawei ban sa wan. Kadei ka jingkitkhlieh jong ngi ba ngin peit bha ïa ka platyngka bad dei na kane ka daw ki jingpynlut kiba bun jongngi ki dei beit na ki jingmih naka jylla hi bad kim dei satia na ka ram,” u la bynrap biang.