Mawkyrwat, Risaw 31: Ka ophis jong u District Sports Officer jong ka South West Khasi Hills District, Mawkyrwat ryngkat ka jingïatreilang bad ka ophis jong u Block Development Officer, Mawkyrwat C&RD Block ka la pynlong ia ka Chief Minister’s Youth Engagement Program jong u snem 2025 ba ar sngi kaba dei jong ka Mawkyrwat Block kaba ka phang pdeng ka long, “Where Youth Rise with Opportunity” ba la pynlong hapoh ka Nativity Auditorium, Mawkyrwat, South West Khasi Hills District.
Ïa kane ka Youth Engagement Programme 2025 ne ka jingïakynduhlang jong ki khun samla la sdang naduh hynnin ka Sngi Balang ka 29 tarik u Risaw, 2025 ba la wan plie da u bah L. Tariang, MCS, Assistant Deputy Commissioner jong ka South West Khasi Hills District kum u kongsan bad la pynkut mynta ka Sngi Palei ka 30 tarik u Risaw, 2025 ha kaba u bah Pynkhrawbor Kharjahrin uba dei u MDC jong ka Mawkyrwat Constituency u la long kum u kongsan.
Lah ban kdew ruh ba ha kane ka Youth Engagement Programme 2025 la wan ïashimbynta da ki 8 tylli ki skul, 9 tylli ki shnong bad na ki ‘riew shimet ha kaba da ka jingwan lang jong ki ha kane ka program ka la long kaba shit ba shngaiñ bad long kaba jop ha baroh ki bynta.
Ha kine ki ar sngi, ki la don shibun ki program jingpynbyrngia bad pynshong shit rhem ïa ki khun samla kata naduh ka Folk Song, Folk Dance, ka Painting, ka Quiz, ka Story Writing, ka Poetry Writing, ka Tug of War, ka Science Mela, bad kiwei de ki program kyrpang.
Ym tangkata, ha kane ka sngi ban pynkut kum ka dak jong ka jingburom bad ai mynsiem na ka bynta ki nongwan ïashimbynta, ki nongpynïaid ki la ïoh ban sam ïa ki khusnam jingjop kita ki long ha ka Poetry Writing la jop da Laribiang Tongwah na ka Sngap Syiem College, Mawkyrwat, ha ka Story Writing la jop da u Pyndapbor Wartde jong ka St. Xavier College, Umoid.
Nangta, ha ka Declamation Competition la jop da u Stivenson Jyrwa jong ka St. Xavier College, Umoid, ha ka One Act Play la jop da ka Maharam Government Higher Secondary School, Mawkyrwat, ha ka Science Mela la jop da ka St Xavier College, Umoid, ha ka Painting la jop da Mebanker Nongsiej jong ka Sngap Syiem College, Mawkyrwat.
Shuh shuh ha ka Quiz Competition la jop da ka Sngap Syiem College, Mawkyrwat, ha ka Solo Guitar Competition la jop da u Khlaiñbor Ramsiej na Shnong Pyndensakwang, ha ka Tug of War la jop da ka St. Xavier College, Umoid, ha ka Folk Song la jop da ka St Xavier College, Umoid bad ha ka Folk Dance pat la jop da ka Ri Maram Folk Academy, Mawlangwir.
Kiba la ïa donlang ha kane ka sngi ki long naduh u bah I. Lawrynïang, MCS, Block Development Officer ka Mawkyrwat C&RD Block, u bah B. Jyrwa, MPS, Superintendent jong ki Pulit ka South West Khasi Hills District, u bah O.L. Passah, Superintendent jong ka Fishery, South West Khasi Hills District, u bah D. Syngkon, District Sports Officer ka South West Khasi Hills District bad kiwei de ka kynthup naduh ki nonghikai, ki khynnah bad ki samla pule.
