Ban lait ka tih dewiong be-aiñ ka sorkar ka dei ban thaw lad ban ïoh pyndap jahkpoh kiba shah ktah na ka kam tih dewiong: Justice Katakey

Shillong, Rymphang 13 : Ka Committee u Justice (Retired) BP Katakey kaba bthah ïa ka sorkar jylla ba kan pyrshang tyngeh ban pyntreikam da ki projek bapher bapher ban ai ka lad kamai jakpoh ïa ki paidbah kiba shah ktah na ki kam tih dewiong ha ka jylla.
Haba aiti ïa ka interim report ba 27 sha ka ïing Bishar High Court jongka jylla, u Katakey u la ong, “(Ngi ai jingmut) ïa ka Sorkar Meghalaya ban pyrshang tyngeh ban pyntreikam da ki projek bapher bapher ban ai ka lad kamai jakpoh ïa ki briew kiba shah ktah ha ki kam tih dewiong, khnang ban pynkutnoh ïa ka ka kam tih dewiong beaiñ ban kamai jakpoh”.
Ka la bthah ruh na ka sorkar jylla ba kan sdang noh mardor ban pyntreikam ïa ki projek ba la mynjur da kaba pyrkhat ïa ka jingthmu kumba la pynwandur ïa ki da ka Oversight Committee.
Ka kaiphod ka la pyntip ba u Secretary ka tnad Mining bad Geology u la pyntip sha ka Komiti ba ka Oversight Committee ka la don ka jingïalang kaba hynñiew kaba la long ha ka 16 tarik u Lber, 2024 hapoh ka jingïalam jong u Amandeep Garg, IAS, Addl Secretary ka Ministry of Environment, Forest and Climate Change, ka la ïakren ia kane ka kam kaba ïadei bad ka jingthaw ïa ki skhim bad kiwei ki lad kamai jakpoh ïa ki briew ba sah ha ki jaka ba ktah ka jingtih dewiong bad hadien ka jingïakren kaba sani, la ai jingmut ïa ki katto katne ki project ha ryngat ki kyndon.
“Ka tnad pyntreikam ka dei ban bud ryntih ïa ki kyndon treikam ba la kdew ha ka DPR. Ka tnad pyntreikam ka dei ban aiti ïa ka kaiphod treikam man la ka lai bnai sha ka Technical Committee, ka ban bishar bniah ïa ki kaiphod bad ai jingmut sha ka Oversight Committee bad Ka jingïaid shaphrang jong ka projek kan long hapoh ka jingpeit bniah ba la buh kyrpang da ka State Level Monitoring Committee (SLMC), Directorate of Mineral Resources and State Forest Department.”
La pyntip ruh sha ka Komiti ba kine ki projek harum ki dei kiba la mynjur da ka Oversight Committee ha ka dorbar kaba hynñiew jong ka bad kine ki kynthup: “Ka jingïarap ïa ki briew ba sah ha ki jaka ba tih dewïong lyngba ki jingthung ïa ki jingthung ba iwbih ka ban leh da ka Institute of Natural Resources ha ka dor Rs 20,18,250, ban sumar ïa ka Law Adong kaba don marjan ka Kshaid Shadshrieh, Sohra ban kyntiew ïa ka Eco-Tourism da ka tnad Forest & Environment ha ka dor T.1,32,50,000, ka jingtyrwa ban shna ïa ka Organic Model Firm da ka ophis District Horticulture, Khliehriat ha ka dor T.51,28,532, Ka jingtyrwa ban buh ïa ka Barsha Pump Project da ka ophis Divisional Soil & Water Kliehriat ha ka dor ba T.18,50,000 bad ka Jingtyrwa na ka bynta kiwei pat ki lad kamai jakpoh kiba ïadei bad ka mariang sha ki briew jong ki jaka ba shah ktah ha ka kam tih dewiong da ka Directorate of Commerce & Industries ha ka dor T.22,28,100.”