Ban kyntiew ïa ki kam thaiñ jaiñ, da ka ophis bad showroom plie ka Meghloom

Nongpoh, Nailur 29: Ka Meghloom Eri Women Producer Company Limited (MEWPCL) kawei naki kompani kaba lum ba lang ïaki longkmie kiba im da ka kam thaiñ jaiñ, mynta ka sngi kala plie paidbah syndon ïaka ophis treikam bad kumjuh ruh ka showroom ban die bad pyninam ïaki ksai bad jaiñ ryndia harud surok bah National Highway 6 haka shnong Pahamlapong, Ri Bhoi District.
Ïa katei ka showroom la wan ban plie paidbah da u Bah Mayral Born Syiem MLA ka Nongpoh kum u kongsan haka jingdonlang ka kong Rona Khymdeit MDC ka Nongpoh, ka E Marak Assistant Commissioner ka Ri-bhoi District, ka Kong M Langstieh CEO ka Meghloom, Bah Ronald Kynta COO MSRLS, ki longkmie na kylleng ki shnong kiba ju im da ka kam thaiñ jaiñ bad kiwei kiwei.
Hadien katei ka jingplie ïaka ophis treikam haka shong Pahamlapong, naka liang ka Meghloom kala pynlong ruh ïaka 4th Annual General Meeting jong baroh ki longkmie kiba im da ka kam thaiñ jaiñ ha Parish Hall jong ka St Paul’s ha Nongpoh ban ïakren shibun ki kam khamtam ban kyntiew ïaka kam thaiñ jaiñ.
Haba kren ha kane ka sngi u Bah Mayral Born Syiem kum u kongsan u la pynpaw ka jingsngewkmen ban iohi ba u ksai ryndia bad ka jaiñ ryndia kila sdang ban paw haka jylla bad shabar ka jylla naduh bala ithuh da ka sorkar, bad ka dei ka jingsarong kaba khraw hadien ba kum u nongmihkhmat ryngkat ki ophisar u la ioh ban buddien ïa katei ka kam tad haduh ba la ioh syndon ka jingithuh naka sorkar ha kaba ka Umden-Diwon kala iohnam ruh kum ka Eri Silk Village bad ka jingioh ruh ïa u GI Tag ban don ka jinglongtrai haka jingpynmih ïaki jaiñ ryndia.
U la ïathuh ruh ba ha ki por ba mynshuwa bunsien ki briew ba nabar khamtam na shabar ka jylla ki tuh ïaka nam bad kam trai ïaki jaiñ ryndia bala pynmih da ki nongthaiñ naka them Ri-Bhoi, hynrei naduh bala ithuh da ka sorkar kala don ka jinglong trai da ki nongthaiñ na kane ka district haba pynmih ïaki jaiñ.
Kum u MLA ka Nongpoh kaba dei ruh kawei naki constituency kaba bun bha ki nongthaiñ khamtam ka Raid Nongtluh u la ong ba ka sobjek u ksai ryndai ka don ha syndah ka dohnud jong nga, bad kane baroh ka jingithuh ka sorkar kala urlong ban pynthikna ba ki nongthaiñ jaiñ ki dei ban longtrai ïaka jingtrei shitom ka jong ki ha kaba pynmih ïaki jaiñ Ryndia namar kidei ki jaiñ kiba kyrpang bala pyndonkam kyllum khamtam haba don ki prokram kyrpang bad wat shabar ka jylla.
Naka liang u Bah MB Syiem u la kyntu ruh ïaki longkmie ba kin trei shitom lyngba ki lad jingïarap baka sorkar ruh ka plielad kan long ka jingkyrkhu ïaki bad ka iing ka sem ba kin lah ban ieng hala ki jong ki kjat bad ban kamai pyndap ïaka iing ka sem.