Shillong, Rymphang 8 : Ka National Peoples Party (NPP) ka buh ïa ka thong kaba hakhmat eh ban kyntiew bad wanrah ka jingioh nong ïa ki nongrep bad ïa kane ka la buh ruh kum ka thong treikam ba hakhmat jongka ha ka Manifesto bad ki tyllong ban pynkhlaiñ ïa ki nongrep ki long ban pynkhlaiñ treikam shuh shuh ïa ki skhim FOCUS, FOCUS+, Mission Mode projects bad kiwei pat. Kine ki la ai ka jingkylla ha ka jingim jong ki nongrep. Ki la don bun ki jingjop jong ki nongrep lyngba kine ki skhim , ong u Secretary ka NPP bad NPYF u bah Bajop Pyngrope.
U la ong ka Manifesto jong ka NPP ka kren shai halor ki kam kiba ïadei bad ki nongrep. Lah ban pynkynmaw ba ka National People’s Party (NPP) ka la pyllait ïa ka manifesto kaba ai kyrteng “People’s Document, Vision 2023-28”, ha ka 4 tarik Rymphang 2023 ha ka jingïalang kaba la pynlong ha Jowai, West Jainita hills.
Ka manifesto “the People’ Document, vision 2023-28 kam dei tang ka jingïaid lynti jong kane ka sorkar hynrei kadei ruh halor ki kam bad ka jingkyntiew ïa ka imlang sahlang haka jylla. Haba kren halor ki skhim ki bapher bapher une u nongialam u la pynskhem ba kine ki skhim kin nang bteng ban ai ka jingshakri ïa ki paidbah.
U bah Bajop u la ong ki don ki scheme kiba la pyllait ha kine ki 5 snem da ka sorkar MDA hapoh ka jingialam ka NPP kaba la ïarap ïa ki nongrep khamtam ka jingwanrah ïa ka FOCUS, FOCUS+, Mission mode bad katkum ka jingthoh, haduh 3.1 Lakh ki nongrep hapoh ka FOCUS bad FOCUS+, 1.5 Lak ki nongrep hapoh ka Mission Mode Projects bad 1 Lak ki nongrep ha kiwei lat ki scheme kila ïoh jingmyntoi. Ka thong jong ka sorkar ka long ba ha kine ki 5 snem ban wan, ka FOCUS bad FOCUS+ kan ai jingmyntoi ïa palat 8 lak ngut bad ïa ka Mission Mode Projects yn kyntiew shaduh ki 5 Lak ngut ki nongrep, bad yn lut palat Rs.2500 klur na ka bynta ka FOCUS bad FOCUS+ bad Rs.1,000 klur na ka bynta ka Mission mode.
“Ban pyniar ia ka ioh ka kot, yn pynkhlaiñ ia ka Village Cooperative Societies bad Collective Marketing Centres (CMCs); yn wanrah ruh da ka Custom Hiring Centers (CHCs) ban pynkhlaiñ ïa ki bor machine; bad yn wanrah ruh ïa ka ‘Chief Minister’s – Farm to Plate’ ban die ïa ki jhur ki jhep kiba dang bha” ong une u nongïalam ka NPP.
Ka manifesto jongka NPP ka kular ruh ïa ki surok kiba bha ki ban pynïasoh ïa baroh ki shnong na ka bynta ban pynïaid ïew ïa ki jingthung jingtep sha ki iew ki hat ong u bah Bajop.
Ka Party ka la pynbna ban kan ai 50% ka subsidy sha ki nongrep. Nalor kane, ka party ka don ka thong ban peit ruh ïa ka jingkiew dor ki marrep.Ka document ka don ïa ka thong ban pynbiang ïa ki jingdonkam na ka bynta ki jingthung organic, training and skill development na ka bynta ki khun samla ha kaba ïadei bad ka kam ri dohkha, ri mrad, crop insurance bad ban wanrah da ka college. Ka party ka pynbna ba ka thmu ban wnarah da ka multi sectoral development ban pynbit pynbiang ïa ki jingdonkam jong ki nongrep.
