Nongpoh, Nohprah 19: Ka Central Silk Board, MESSO, P-3 Unit Nongpoh ha ka sngi nyngkong ka la pynlong ïa ka Muga Farmer’s Field Day Programme ban kyntiew ïa ka rukom ri bad pynmih ïa u khñiang Muga khamtam ha Ri-Bhoi District kaba dei kawei naki district ba pawnam halor ka jingpynmih ïa u khñiang ryndia, bad kumjuh ruh u Muga.
Ha katei ka prokram la wan ruh ban shim bynta shitrhem da ki nongri khñiang ka thaiñ Marngar bad Nongpoh ban ai jingtip sha ki nongrep shaphang ki rukom ri khñiang ba kham sted katkum ka juk stad mynta bad ban pynbit pynbiang ïa ki jingeh kiba kynduh da ki nongrep.
U Mr. Abhishek Singh, uba dei u Scientist-C, Central Silk Board, MESSO, Nongpoh, u la ai jinghikai halor ki rukom ri ïa ki khñiang muga katkum ka juk stad mynta ban kyntiew ïa ka jingmih jong ki khñiang bad ban ïakhun ïa ki jingeh ba ju wan hap ha ki nongrep da kaba pynshai ruh ïa ki lad ki lynti ban pynbun ïa ka jingri ïa u khñiang muga ha Ri-Bhoi District.
Na ka liang u Bah L. Rympei, Sericulture Inspector na ka State Sericulture Office, u la batai bñiah ïa ki skhim sorkar bad ki jingai jingïarap ïa ki nongrep muga ba kynthup ïa ki jingïarap pisa bad ki lad jingïada kiba thmu ban pynkhlaiñ ïa ka kam ri khñiang bad thaiñ jingthaiñ, kaba la ai jingmyntoi shikatdei bad pynkmen ïa ki nongrep.
Ha kane ka sngi, la pynlait ruh ïa ka kot lyngkdop ba la ai kyrteng ‘Integrated Practices for Muga Silkworm Rearing and Plantation Management for Rearers’ ban long kum ka jingtip kaba biang ban ïarap ïa ki nongrep ban pynbha ïa ki rukom ri bad pynneh pynsah ïa ki jingthung jingtep.
Lyngba katei ka prokram ka la long shisha ka jingmyntoi bad ka jingkyrkhu ïa ki nongri khñiang muga ban ioh ïa ki jingtip bapher bapher bad khamtam ban dang kyntiew ïa ka rukom ri bad pynmih ïa u khñiang muga bad ka ioh ka kot ki paidbah.
