Shillong, Naitung 07 : U Myntri Rangbah ka Jylla Conrad K Sangma, mynta ka sngi Thohdieng, ula lum ïa ka jingïalang jong ki Heh Ophisar ka Tnad ka Koit ka Khiah ha ka jingïadonlang ka Myntri Kong Ampareen Lyngdoh, ban ïasyllok halor ki buit ban pynkhlaiñ bad pynjanai ïa ki jingai jingshakri jong ki jaka ai jingsumar hapoh ka Jylla.
Kane ka sienjam ka dei kaba la shim kum shibynta na ka jingkut jingmut jong ka Sorkar ban pynjanai ïa ka rukom ai jing shakri ki jaka ai jingsumar ïa baroh ki nongshong shnong ka Jylla.
Kawei na ki mat ba ïakren ha ka jingïalang ka long ban wanrah ïa ka Public Health bad Specialist Cadre System hapoh ka Tnad ka Koit ka Khiah. Kane ka Policy ka dei kaba thmu ban pynjanai ïa ka jingtreikam ha ka liang ka koit ka khiah bad ban pynthikna ba ki jingshakri jong ki doktor specialist kan poi sha kito kiba donkam.
Nalor kane, ka Meghalaya ka la pyntreikam ruh ïa ka rukom ba thymmai ha ka jingthied jingpet jong ka Tnad ka Koit ka Khiah ha kaba ki jaka ai jingsumar ki dei ban phah ïa ki jingdonkam bad ka tnad kan leh mar mar ïa ka kam ba dei ban leh. Kane ka rukom ba thymmai kan pynthikna ba ki jingdonkam baroh kin poi sha ki jaka sumar khlem kano kano ka jingthut.
Ha kajuh ka por, ka Sorkar Meghalaya ka dang pynkhreh ruh ban wanrah ïa ka policy kaba shai ha ka jingpynkynriah kam bad thungkam ïa ki nongtrei ka koit ka khiah. Kane ka policy ym tang ba kan pynkhlaiñ ïa ka jingdon ki nongtrei hynrei kan pynthikna ruh ba ka jingbuh ïa ki nongtrei kan long mar katjuh ha kylleng ki jaka sumar ka Jylla.
Haba ithuh ïa ka jingdonkam ban ïadon bynta lang ki shnong ki thaw, ka Sorkar ka la pynkhreh ruh ban thaw ïa ki Village Health Council, ki ban long ki rynsan ban ïakren hapdeng ki shnong ki thaw bad ki bor khmih ka tnad ka koit ka khiah, ban pynthikna ba ki rai halor ka koit ka khiah ki dei kiba ïaid kat kum ka jingdonkam bad jingangnud u paidbah.
U Myntri Rangbah ula pynpaw ïa ka jingsngew skhem ba kine ki sienjam bad ki policy kin wanrah ïa ka jingkylla ha ka jingshakri ka Sorkar ha ka liang ka koit ka khiah hapoh ka Jylla.
