Shillong, Naiwieng 9 : Ka kynhun myntri kaba la ïa kynduh mynta ka Sngi Balang ka la mynjur ïa ka jingthung jongka sorkar ïa ka Meghalaya State Education Commission (MSEC) naka bynta ban pynkhreh nadong shadong kiei ki lad ki lynti ban wanrah ka jingpynkylla thymmai ban kyntiew pat ïa kane ka tnad ha ka jylla.
Kane ka Commission kaba don saw ngut ki dkhot kan wanrah ki jingai jingmut kumno ban pynbeit noh ïa ki jingdon kyrdan bun ki skul ha ka jylla. Ki dkhot ka MSEC ki kynthup ïa u ne ka Chairperson, arngut ki adviser bad iwei i Secretary.
Haba kren sha ki lad pathai khubor u Myntri Rangbah u Conrad K Sangma u la ong “ Ka long kaba donkam eh ban tip ba kane ka long kawei na ki mat ba la ïakren baroh shi katta ba donkam da ka Commission ban thung ha ka tnad pule puthi ka ban peit bad pynbeit lut ïa ki kynrum kynram kiba don hapoh ka tnad. Ka kam jong kane ka Commission ka long ban ai jingmut ïa ka sorkar ha kaba ïadei bad ki skul bad College, ka rukom pynhap kyrdan ïaki, ka tulop ki nonghikai, ka rukom pynïaid ïaki skul bad college bad kiei ki lad ki ban shim ban pynbeit ïa kine kiei kiei baroh khang ba kane ka tnad kan ïaid beit bad lah ruh ban pyntreikam ïa ka National Education Policy 2020 bad kumjuh ruh ïaka State Education Policy ha ka rukom kaba dei”.
U la ong ba ka MSEC kan peit ruh ïa ka rukom pynïaid ïa ki skul bad college ba shu ïoh jingkyrshan na ka sorkar kumno ki treikam bad kumno la pynïaid da ki Managing Committe. Nalor kata kan peit ruh naduh ka rukom siew tulop ïaki nonghikai kumno ban pynïaryngkat ïa ka tulop jongki, ïa ki nonghikai SSA, Aided School, ki skul kiba ym don ba rung skul, kiba don 0 ki khynnah skul, kiba don tang saw ne san ngut ki khynnah skul, ki nonghikai bad ter ter. Dei ruh kane ka Commission ban peit na ka bynta ban thung ïa ki nonghikai ban hikai ïaka ktien lajong ha ki skul khamtam ha ki nongkyndong.
“Ka daw ba la thung ïa kane ka Commission ka long ruh ba tang ka sorkar kam lah ban pynleit jingmut ha kane ka tnad kaba la kynrum kynram ka rukom pynïaid ban thung kam nonghikai kaba naduh ba sdang hi kumta ban pynbeit pat ïa kine kiei kiei baroh donkam da kane ka commission ban bishar bniah nadong shadong bad ai jingmut kumno ban ïaid pat nangne shakhmat” ong biang u myntri rangbah.
Hooid ka sorkar ka la pyrshang ban leh ei ei ha kine ki saw snem bad ka la don ruh ka jingkylla bad jingseisoh hynrei wat la katta ruh ban pynbeit shisyndon donkam keiñ ïa kane ka commission ong u myntri rangbah.
“Kat kum ka jingai mark na ka PGI jongka Niti Aayog ka long kaei kaei kaba ngi sngew tynnad ban tip ba ka jylla Meghalaya ka la wan ha ka kyrdan ba ar napdeng ki jylla kiba la kiew sted ha ka ri ha ka liang ka jinglah ban pynbiang ïa ki jingdonkam ha ki skul kata naduh ki ïing skul bad ter ter. Ha kane ka thaiñ shatei lam mihngi ka Meghalaya ka la wan ha ka kyrdan ba nyngkong ba ka dei ka jylla kaba lah ban pynbha bad pynbiang ïa ki jingdonkam ki skul bad ha kiwei kiwei ki bynta pat ka Meghalaya ka wan ha ka kyrdan kaba san ha ka ri. Kat kum ka PGI Niti Aayog ka jylla Meghalaya ka wan ba san kum kata ka jylla ba la nang kiew shakhmat bad ba ar ha kane ka thaiñ shatei lam mihngi ka ri India” ong u Myntri Rangbah.
