Ban ïarap ïa ki samla wad kam, kyrpad ka FKJGP ïa ka SLBC ban buh da ka shlem ai jinghikai RSETI

Khliehriat, Jylliew, 28: Ka Federation of Khasi, Jaiñtia and Garo People East Jaiñtia Hills District, ha ka 18 tarik mynta u bnai ka la leit ban buh da ka jingthoh hakhmat u Convener jong ka State Level Bankers Committee Shillong bad ka seng ka kyrpad ïa ka committee ban buh noh da ka shlem ai jinghikai, Rural Self Employment Training Institute ( RSETI) ha East Jaiñtia Hills District bad kane kan iarap shibun ïa ki samla wad kam, ka ban iarap ruh ban tehlakam ïa ka jingkyrduh kam.
Katkum ka shithi, ba la buh da ka FKJGP East Jaiñtia Hills District ba la soi da u President, u bah Deihok Sumer bad u General Secretary, u bah Emlang Sutnga,ka seng ka pynpaw ba ka East Jaiñtia Hills District ka la nang kiew na ka por sha ka por ha kaba ki samla pule ruh ki la nang mih na ka por sha ka por hynrei sngewsih pat ba ka don ka jingkyrduh kam ha ka thaiñ bad bun bah ki samla ki dei kiba khlem kam, kiba dang donkam haduh katta katta ban ïoh ïa ki kam ki jam ban lait na ka shnong khlem kam, ha kajuh ka por ki tnat treikam jong ka sorkar kiba don hapoh ka district ruh kim lah ban pyndap ïa ka jingdonkam ki samla ha ka iohkam iohjam na ka daw bym don ne ba duna ki post kiba lait, nalor kata ki don ruh ki company dewbilat hapoh ka district ha kaba ka jingthep kam jong kine ki company ruh kam pat lah satia ban tehlakam ïa ka jingkyrduh kam ha ka thaiñ.
“Ban weng ïa kane ka jingeh ha ka iohkam iohjam jong ki samla jong ka district, ngi da kyrpad jur ïa ka ophis jong ka State Level bankers Committee ban thaw ne ban buh noh da kawei ka shlem ai jinghikai, ka Rural Self Employment Training Institute hapoh East Jaiñtia Hills District ba kan ai ka jingkyrmen ïa ki samla wad kam bad ruh da ka jingdon kane ka jaka ai jinghikai kan iarap ha ka lad ïohkam ïohjam ha ki shlem ne ki Institute bapher bapher bad kan iarap ruh ïa ki khun samla ba kin lah ban kynjoh ïa kata ka thong kaba katkum ka sap ka phong ba ki don lyngba ka jingioh jinghikai bad kan pynlong ruh ïa ki samla ba kin don kata ka jingshaniah halade bad ruh kan pynshlur ïa ki ban long kita ki nongkhaiï kiba lah ban ieng hala ki jong ki kjat bad kin long ruh kita ki nongai kam ai jam ïa kiwei ki samla bym don kam” pynpaw ka seng.
La bynrap ruh, “lada don ka shlem ai jinghikai RSETI hapoh ka district kan iarap shikatdei eh ïa ki longïing kiba trei meit la bad sngi ban ioh ïa ka bam ban pyndap ïa ka ïing ka sem bad jingdonkam ki khun, kumta kum ka seng ngi kyrpad ban don noh kane ka shlem RSETI hapoh ka district” pynpaw ka FKJGP-EJHD ha ka shithi sha u Convenor jong ka State Level Bankers Committee Shillong , Meghalaya.