Ban hikai ïa ki samla ban ïakhun ïa u drok bad kiwei ki jingdih beaiñ

Shillong, Lber 22 : Ki la don haduh kumba 1826 ngut ki samla pule kiba la myntoi n ka “Soft Skills and Wellbeing Winter Camps” halor ka phang pdeng ‘Ïa ka Mynried’, ba la pynlong da ka jingkyrshan ki bor distrik jong ka East Jaintia Hills ha ki 11 tylli ki jaka pule.
Ha kane ka sngi kut, ki la don haduh 247 ngut ki samla pule na ka St. Peter Secondary School kiba la ïoh pdiang ïa ki syrnod ha Iongkaluh, katba ha Byrndihati pat ki la donbynta 126 ngut ki khynnah pule jong ka Sacred Heart Secondary School, bad 315 khynnah pule jong ka Byndihati Secondary School.
La donlang ruh ha kane ka sngi da ka MLA jong ka thain kong Santa Mary Shylla, kum ka Kongsan ha ka jingïalang kaba long ha Sacred Heart Secondary School, Byndihati.
Kane ka jingïalang lah pynwandur na ka jingthmu jong ka sorkar jylla ban teh lakam ïa ki jingdih buaid hapdeng ki samla shynrang bad kynthei.
La ai kyrteng lah ai “ïa ka Mynried” kaba pynkylla na ka ktien Pnar sha “na ka bynta ka lashai kaba kham bha”, kane ka Winter Camp ki la ai ruh ïa ka lad ïa ki samla pule ban pyni ïa ki sap ki phong jong ki, ban pynskhem ïa ka jingsngewrit bad ban ïarap ïa ki nongïashim bynta ban ithuh bad rakhe ïa ki jinglong jong ki shimet.
Na ka liang ka samla Graious Phawa, Class 8, jong ka St. Peter’s Secondary School, haba batai shaphang ka jingshem jong ka ha Iongkaluh ka la ong, “Kane ka prokram ka la ïarap shisha ban tei ïa ka jingshaniah bad jingsngewthuh jong nga shaphang ka jingkoit jingkhiah ha ka met, ka jingmut jingpyrkhat. Nga ai khublei ïa u DC bad ki staff jong u kiba la ai ïa ngi ïa kane ka prokram.”
Haba kren ha ka jingïalang, ka Kong Santa Mary Shylla, ka la ong, “Ki winter camp ki la wanrah ïa ka jingmyntoi ha ka District namar ba ki samla pule ki la ïoh ïa ka jait jinghikai kaba lah ban kyntiew ïa ka jingim jong ki.Nga kyrpad ïa iwei pa iwei i samla pule ba kin shim ïa kane kum ka bynta ban long ki briew kiba kham bha.”
Kum ban shu pynkynmaw, kane ka sienjam ka long ban kyrshan ïa ka jingthmu jong ka jylla ban ïaleh pyrshah ïa u drok hapoh ka ka Drug Reduction Elimination & Action Mission (DREAM).
Na ka liang u Deputy Commissioner ka East Jaintia Hills u Shivansh Awasthi, IAS, ha ka jingkren u la ong, “Nalor ïa ka jingai jinghikai ha ki kam bapher bapher, kawei ka mat ba kongsan jong kane ka prokram ka dei ban ithuh ïa ki sap ki phong ba ki khynnah ki don.”