Bamja miet u Bah Michael Kharsyntiew bad ki khunswet ka AW Thomas Girl’s Home Orphanage

Shillong, Nailar, 16: Kum ka jingrakhe ïa ka jingïoh laitluid kaba 76 snem ka ri India, u Bah Michael Kharsyntiew ha ka 15 tarik u Nailar, 2022 u la leit jngoh ïa ki khunswet kiba la ri bad sumar ha A W Thomas Girls Home Orphanage kaba don ha Jaïaw Lumsyntiew, ïa kaba la pynïaid da ka Khasi Jaintia Presbyterian Synod.
Ha kane ka jingleit jngoh lem bad ki bahaing hasem bad ki paralok ïa kine ki khynnah kiba sah ha kane ka jaka ri khunswet, u Bah Michael Kharsyntiew u la bamja miet lang bad ki ha ryngkat ka jingïadonlang jong ka National Executive Member ka BJP Seng Kmie ka Kong Sumie Laloo bad ka State Incharge jong ka Jylla Manipur.
Ha kane ka janmiet, la ot ïa u cake Independence Day ba lah shet kyrpang ha ka dur ka lama India bad hadien kane la pynlong ruh ïa ka jingduwai ba kyrpang da kine ki khunswet na ka bynta ka jingrakhe ïa ka jingïoh laitluid kaba 76 snem jong ka ri India.