Bam shngiam ki thylliej ding ïa ka ïing ki Singhania ha Thana Road, Police Bazar

Shillong, Risaw, 14: Ki thylliej ding kiba rhem ki la bam shngiam bad pynkylla dpei ïa ki jingdon jingem ha ka iing mala jong ki Singhania ha Thana Road, Police Bazar ha ka sngi Saitjaiñ.
Ïa ka jingkem ding jong kane ka ing ym pat lah satia ban tip ïa ka daw tynrai hynrei ki Pulit ki la pynlong ïa ka jingtohkit ban lap ïa ka jingsdang jong ka ding kaba la lam shaduh u pud ba ki jingdon jingem kiba don hapoh kane ka iing mala kin kylla dpei tang ha ka shikhyllipmat.
Ka jingpluh jong kane ka ing mala ha Thana Road markhap bad ka Payal Cinema, ka la jia ha ka por kumba 1:15 noh phai sngi. Ki thylliej ding ba itriem ki la klang hapoh ka ing baroh kat haduh ba ki Pulit pynlip ding jong ka tnat Fire and Emergency Services (F& ES) ki la ïakhun haduh ka por nohphai sngi tad haduh ba la thoh ïa kane ka khubor ha ka por 10:00 baje mynmiet.
La ïohi ruh ïa ka tdem kaba la kiew arsut sha suiñ wat haduh ka por 10 baje mynmiet katba ki bor Pulit ka tnat Pynlip ding bad ki bor Shipai ki la ïakhun ban tem ïa ka jingklang jong ka ding kaba la neh da ki bun bun kynta.
Na ka jingklang jong ka ding la ïoh sngew ruh ïa ka jingbthei kaba mih na kane ka jaka ba la jia ka jingpluh ding. Ki kali pynlip ding jong ka tnat Fire and Emergency Services (F& ES) tang shu ïoh jingtip ki la pynher kum ki khnam ïa ki kali pynlip ding ban pynpoi kloi khnang ban tem ïa ka jingklang jong ki thylliej ding hapoh kane ka ing ïa kaba la ïathuh ba don ka dukan ba la tip kum ka Janata Furniture bad ka kudam lum thup ïa ki jaiñ bad kiwei kiwei de ki tiar.
Ha ki kynta ba ki kali pynlip ding ki la rung sha surok Thana Road, ki Pulit pynïaid kali jong ka Shillong Traffic Police (STP) ki la khang lut ïa ki kali ban rung sha Khyndai Lad. Kane ka la wanrah ïa ka jingdheng kali kaba jur ha jylli jong ka nongbah Shillong naduh ka por nohphai sngi haduh ka por janmiet.
Ka Deputy Commissioner ka Kong RM Kurbah lem bad ki Magistrate kynthup ruh u Superintendent of Police, ka East Khasi Hills u Bah S. Nongtnger bad kiwei kiwei de ki heh Pulit ki la hiar jurip ïa kane ka jingjia. U Superintendent of Police, ka East Khasi Hills u Bah S. Nongtnger u la pyntip ruh ba ha kane ka jingjia uwei u briew u la duh ei ïa la ka jong ka jingim hynrei kat haduh ba la thoh ïa kane ka khubor ki Pulit kim pat lah satia ban ïathuh ïa ka kyrteng jong une uba la khladnoh
Ban tem ïa ka jingklang ki thylliej ding, ki Pulit ki la hap ban pyndonkam da kaba kawang da ki File Ball. Nalor kata, la sakhi ruh ba wat haduh ka por mynmiet ki kali pynlip ding bad ki Pulit ki dang ïakhun ban kynshait um ïa ka jingklang jong ka ding.
Ki bor shipai ki la hap ban wanrah ruh da ka kali Pynlip ding lajong ban pyndonkam da kaba synreit da u Foam (Sboh) ban pynlip ïa ka ding hynrei watla katta namar ka jingjur shaba palat jong ka ding ki shipai ki dang durut tyngeh ban pynlip ïa ka ding kaba dang rhem shapoh jong ka ing.
Ïa ka thylliej ding kiba rhem hapoh ka dukan jong u Amit Singhania ym pat lah satia ban tehlakam watla ki Pulit pynlip ding ki la pyrshang ban ïakhun na kiba bun ki jaka ban ïoh pynlip noh ïa ka ding.
Haba kylli, la ïathuh ba ki Kali Pynlip ding ki la leit bad wan phai bun kylla ban pynlip ïa ka ding. Ka jingkhapngiah jong ka surok ka long ruh ka daw kaba pynthut ïa ka jingïaid beit sak sak jong kine ki kali. Ki Pulit ki la hap ban tan da ka um na Pung Nan Polo (Ward’s Lake) ka jaka ba kham jan ban pynpoi kham kloi ïa ka um sha ka jaka ba jia ka jingpluh ding ha Thana Road.
Kat haduh ba la pynmih ïa kane ka khubor, ym pat ïoh jingkheiñ satia haduh katno ka jingjulor, ka jingsdang jong ka ding bad ka jingdon jong kiba mynsaw.