Nongpoh, Naitung, 14: Ar tylli ki iing ki la kylla dpei ha ka shnong 18 mer Umdoh, Ri-Bhoi District hadien ba ki thylliej ding barhem ki la bamduh naphang ïa baroh ki jingdon jingem kat haduh ba ka la wanrah ruh ïa ka jingduhnong kaba khraw ïa ki trai ïing.
Kane ka ïing ka dei jong ka Kong Shebil Pohshna bad ka Kong Pangsngiatshisha Khriam. Katkum ka thymmei khubor, la ïathuh ba ka jingpluh jong ki ar tylli ki ïing ka la jia dang step phyrngap ha ka por 3:00 baje eiei katba ki trai ïing ki dang ïohthiah lyngngai bad hadien ba la ïohi ïa ka ding kaba la klang ki trai iing ki la ïoh ban mih noh hapoh ka iing ban lait na ka jingmynsaw.
Ki bor synshar shnong ki la pyrshang ban pynlip katba lah ïa ka ding kaba klang bad ki la pynti ruh sha ki Pulit ka tnat Fire and Emergency Services, hynrei namar ka jingklang jong ka ding ka long kaba shyrkhei bha ki Pulit jong ka tnat pynlip ding ki la hap ban ïakhun haduh ban da lah ban pynlip ïa ka ding.
Ïa ka daw tynrai halor kane ka jingjia ym pat lah ban tip satia bad ki Pulit ki dang pynlong ïa ka jingtohkit.
