Nongstoiñ, Rymphang, 4: Ki paidbah jong ka thaiñ Nongstoiñ kynthup ïa ki seng longkmie, seng samla bad ki sengbhalang bapher bapher ryngkat bad ka Dorbar shnong, ha ka janmiet sngi ba ar ki la mih paidbah ban pynrem ïa u riew thrang snam u ba la shim jyndat jubor ïa ka jingim ka samla Lilyioris Wahlang kaba la jia naduh ka 20 tarik u Kyllalyngkot 2025.
Ïa ka sur jingpynrem la sdang da ka jingïaid rally naduh na ïing ki lanot ter ter shaduh jingkieng Warriat, ha kaba u secretary shnong bah G.Marbaniang u lam khmat da ka jingïalang kaba lyngkot ha phyllaw ka Market Complex New Nongstoiñ ryngkat ka jingthang mombati.
La pynlong shuwa ka jingsngap jar kaba shi mint ha katei ka jaka, kum ka dak ka jingsngew lem bad la ïoh ruh ban ai jingkren da ki dkhot ki sengbhalang bapher bapher kynthup ïa u bah Johnmilton Wahlang na ka kur ki lanot, shuh shuh na u bah W.Wanñiang president ka KSU Nongstoiñ.
Nangta u bah D.Sun na ka seng WKSU, u bah Wantei Lyngdoh na ka seng HYC, u bah Hamar Lyngkhoi na ka seng MYF, bah Mawkordor Kharsyiemlieh na ka seng RKS, kong Ibiris Nonglait bad kiwei kiwei kyntheup ïa ka kong A.Kharsyntiew Secretary ka Seng Longkmie New Nongstoiñ.
Ha ka jingkren, kiba bun ki la pynpaw ïa ka jingpynrem bad ha kajuh ka por ki la dawa na ka tnad pulit bad ki bor sorkar, ba ki dei ban shimkhia halor kane ka jingjia. Ki la dawa ba dei ban kem mardor ïa ki nongleh kam sniew bad ban pynshitom katkum ki kyndon jong ka aiñ ïa ki nongpynïap briew.
